ວັກຊີນ Johnson & Johnson ຈະຖືກສົ່ງໄປບັນດາແຂວງ 17-25 ກໍລະກົດນີ້ ຂໍໃຫ້ມີການຈັດສັດຜູ້ມາສັກໃຫ້ເປັນລະບຽບ

    0
    406

    ໃນວັນທີ 17 ກໍລະກົດ 2021  ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມ ຄວບຄຸມພະຍາດຕິດຕໍ່ ກະຊວງສາທາລະນະສຸກ,  ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບຕາງໜ້າກອງເລຂາຄະນະສະເພາະກິດ ເພື່ອປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19ທີ່ກະຊວງສາທາລະນະສຸກ.

    ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກ່າວວ່າ: ມາຮອດປະຈຸບັນ ສປປ ລາວເຮົາ ໄດ້ສັກວັກແຊງໃຫ້ພໍ່ແມ່ປະຊາຊົນ ທັງໝົດເຂັມທີ 1 ໄດ້ 1.050 ,680 ໂດສ ແລະ ເຂັມທີ 2 ສັກໄດ້ 722.542 ໂດສ, ເຊິ່ງຫຼາຍແຂວງກໍ່ກຳລັງເລັ່ງສັກ ເພື່ອສ້າງພູມຄຸ້ມກັນໃຫ້ປະຊາຊົນພາຍໃນແຂວງຕົນເອງ ແລະ ແຂວງທີ່ໄດ້ສັກຫຼາຍກວ່າໝູ່ແມ່ນ ນະຄອນຫຼວງວຽງຈັນ ກວມເອົາ 43,5% ຂອງຈຳນວນພົນລະເມືອງ, ຖັດມາແມ່ນແຂວງບໍ່ແກ້ວ ກວມເອົາ 39,9% ຂອງຈຳນວນ

    ພົນລະເມືອງພາຍໃນແຂວງ, ພາຍຫຼັງທີ່ວັກແຊງ ຈອນຊັນ ແອນ ຈອນຊັນ Johnson & Johnson ທີ່ລັດຖະບານສະຫະລັດອາເມລິການໄດ້ຊ່ວຍເຫຼືອຈຳນວນ 1.08.000 ໂດສກໍ່ໄດ້ມາຮອດລາວແລ້ວ ດັ່ງນັ້ນເຮັດໃຫ້ ສປປ ລາວ ມີວັກແຊງທຸກໝົດ 3.143,620 ໂດສ ຈະສາມາດສັກໃຫ້ໄດ້ 2.075,810 ຄົນ ກວມເອົາ 29% ຂອງພົນລະເມືອງທັງໝົດ ແຕ່ຖ້າໄລ່ໃສ່ແຕ່ຜູ້ທີ່ສັກທີ່ສາມາດສັກໄດ້ ມີອາຍຸ 18 ຂຶ້ນໄປ ແມ່ນຈະກວມເອົາ 46%.

    ນອກນີ້ພວກເຮົາຍັງຈະໄດ້ຮັບການຊ່ວຍເຫຼືອດ້ານວັກແຊງອີກໃນໄຕມາດທີ 3-4 ຄາດວ່າຈະສາມາດສັກໄດ້ເກີນ 50% ຕາມທີ່ເປົ້າໝາຍໄດ້ວາງໄວ້, ດັ່ງນັ້ນຂໍໃຫ້ແຕ່ລະແຂວງຈົ່ງຮີບຮ້ອນສັກວັກແຊງ ຍີ່ຫໍ້ ຊີໂນຟາມ ທີ່ໄດ້ສົ່ງໄປຄັ້ງກ່ອນໃຫ້ສຳເລັດພາຍໃນເດືອນກໍລະກົດ ເພາະວ່າທາງສູນກາງຈະໄດ້ສົ່ງວັກແຊງ Johnson & Johnson ໄປໃຫ້ຄາດວ່າຈະໄດ້ຈັດສົ່ງໃນວັນທີ 19-25 ເດືອນກໍລະກົດນີ້ ແລະ ຂໍໃຫ້ແຕ່ລະແຂວງມີການກະກຽມຄວາມພ້ອມໂດຍສະເພາະແມ່ນກຸ່ມເປົ້າໝາຍທີ່ຈະເຂົ້າສັກ, ສະຖານທີ່, ເວລາ ໃຫ້ມີຄວາມລະອຽດ, ຫຼີກເວັ້ນການແອອັດຂອງປະຊາຊົນທີ່ຈະມາໃຊ້ບໍລິການໃນແຕ່ລະຈຸດ, ຂໍໃຫ້ມີການແຈ້ງການຄັກແນ່ ໂດຍປະສານງານກັບອຳນາດການປົກຄອງທ້ອງຖິ່ນ ເພື່ອ

    ຈະແຈ້ງຂ່າວໃຫ້ພໍ່ແມ່ປະຊາຊົນ, ຫົວໜ່ວຍທຸລະກິດ ທີ່ຍັງບໍ່ທັນຮັບວັກຊິນ ເພື່ອໃຫ້ເຂົາສາມາດເຂົ້າເຖິງ ແລະ ມີຄວາມປອດໄພໃນສະຖານທີ່ບໍລິການ.ສຳລັບວັກແຊງ Johnson & Johnson ເປັນຢາຊະນິດໜຶ່ງທີ່ແຕກຕ່າງຈາກຊະນິດອື່ນ ທີ່ຈະຕ້ອງໄດ້ສັກ 2 ເຂັມ ເນື່ອງຈາກສັກເຂັມດຽວສາມາດສ້າງພູມຄຸ້ມກັນໄດ້, ດັ່ງນັ້ນຂໍຮຽກຮ້ອງມາຍັງພໍ່ແມ່ປະຊາຊົນ ຈົ່ງໃຫ້ການຮ່ວມມືກັບຄະນະກຳມະການຮັບຜິດຊອບຈຸສັກຢາ, ມີການຈັດຕັ້ງໃຫ້ການບໍລິການວັກແຊງ ໂດຍສະເພາະຄວາມປອດໄພ ໂດຍການຮັກສາໄລຍະຫ່າງ, ການໃສ່ຜ້າປິດປາກ-ດັງ, ການລ້າງມື ຫຼີກເວັ້ນການແອອັດ, ອັ່ງອໍໃນສະຖານທີ່ບໍລິການສັກຢາຄືດັ່ງທີ່ຜ່ານມາ.