ສະຫວັນນະເຂດ ປິ່ນປົວຜູ້ຕິດເຊື້ອຫາຍດີ ແລະ ກັບບ້ານເພີ່ມ 27 ຄົນ

    0
    155

    ໃນວັນທີ 23 ກໍລະກົດ 2021,  ແຂວງສະຫວັນນະເຂດ ໄດ້ມີພິທີມອບ-ສົ່ງຜູ້ທີ່ປິ່ນປົວດີຈາກພະຍາດ ໂຄວິດ-19 ຈຳນວນ 27 ກໍລະນີ ຢູ່ສູນປີ່ນປົວພະຍາດໂຄວິດ-19 (ວິທະຍາໄລ ວິທະຍາສາດ ສຸຂະພາບ) ແຂວງສະຫວັນນະເຂດ.

    ທີມແພດປິ່ນປົວ ໄດ້ກ່າວຕໍ່ໍ່ຜູ້ທີ່ປີ່ນປົວດີເເລ້ວ ແລະ ຄອບຄົວວ່າ: ພາຍຫລັງທີ່ກັບເມືອບ້ານແລ້ວ ຕ້ອງໄດ້ມີການສືບຕໍ່ແຍກປ່ຽວຈຳກັດບໍລິເວນຕົວເອງຢູ່ເຮືອນຕື່ມອີກ 14 ວັນ, ໃຫ້ເອົາໃຈໃສ່ປະຕິບັດມາດຕະການປ້ອງກັນຢ່າງເຂັ້ມງວດ ໃຫ້ຮັກສາໄລຍະຫ່າງທາງສັງຄົມ, ໃສ່ຜ້າອັດປາກ, ແລະ ໝັ່ນລ້າງມືໃສ່ສະບູ ຫລື ເຈວຂ້າເຊື້ອ ເປັນປະຈໍາ ຕະຫລອດເຖິງການຕິດຕາມອຸນຫະພູມ ແລະ ອາການເຈັບເປັນຂອງຕົນເອງໃນແຕ່ລະວັນ, ຖ້າມີອາການເຈັບເປັນໃດໜຶ່ງ ແມ່ນໃຫ້ໂທປຶກສາແພດເພື່ອຂໍຄໍາແນະນໍາໃນການປະຕິບັດຕົນ.

    ພ້ອມທັງເນັ້ນທາງຄອບຄົວ ແລະ ອໍານາດການປົກຄອງບ້ານໄດ້ຊີ້ແຈງຕໍ່ປະຊາຊົນພາຍໃນບ້ານໃຫ້ມີຄວາມເຂົ້າໃຈ ແລະ ໂດຍສະເພາະບໍ່ໃຫ້ມີການລັງກຽດຕໍ່ຜູ້ຕິດເຊື້ອພະຍາດໂຄວິດ-19, ຜູ້ທີ່ໄດ້ຮັບການປິ່ນປົວດີແລ້ວ ແລະ ຄອບຄົວຂອງເຂົາເຈົ້າ, ໃຫ້ທຸກຄົນໃນສັງຄົມພ້ອມກັນເປັນກຳລັງໃຈ ແລະ ໃຫ້ການສະໜັບສະໜູນ ແລະ ການແນະນຳທີ່ດີຜູ້ທີ່ຕິດເຊື້ອ ກໍຄືຜູ້ທີ່ປິ່ນປົວດີ ແລ້ວເພື່ອໃຫ້ມີກຳລັງໃຈສືບຕໍ່ການປະຕິບັດມາດຕະການປ້ອງກັນພະຍາດໂຄວິດ-19 ແລະ ການດໍາລົງຊີວິດປົກກະຕິແບບໃໝ່ (New normal) ທີ່ປອດໄພໃນຄອບຄົວ ແລະ ໃນສັງຄົມ.

    ປັດຈຸບັນແມ່ນມີ ຜູ້ຕິດເຊື້ອສະສົມ 1.333 ຄົນ, ຍັງຄັ້ງສູນປິ່ນປົວ 1.102 ຄົນ, ປິ່ນປົວດີແລ້ວ 231 ແລະ ຄົນເສຍຊີວິດ 1 ຄົນ.