ບໍ່ແກ້ວເຂດສ່ຽງ ແຕ່ຍັງມີຄົນຈັດງານວັນເກີດ ຊຸມແຊວທ້າທາຍ ໂ ຄ ວ ິ ດ

    0
    358

    ເອົາໃຈຊ່ວຍເຈົ້າໜ້າທີ່ທຸກພາກສ່ວນທີ່ເຮັດໜ້າທີ່ຢ່າງເມື່ອຍລ້າ ເພື່ອຄວາມປອດໄພຂອງບ້ານເມືອງ ດັ່ງທີ່ໄດ້ຮູ້ກັນດີວ່າ ປັດຈຸບັນໂຄວິດ-19 ຍັງມີການແຜ່ລະບາດຢ່າງໜັກໃນຫຼາຍໆແຂວງ ໃນທົ່ວປະເທດລວມທັງແຂວງບໍ່ແກ້ວ ແຕ່ຕາມລາຍງານຈາກທ້ອງຖິ່ນເຈົ້າໜ້າທີ່ລົງກວດກາບັນດາສະຖານບໍລິການຍັງມີຄົນຈຳນວນໜຶ່ງຝ່າຝືນມາດຕະການທີ່ຄະນະສະເພາະກິດວາງອອກ ໂດຍການຈັດງານວັນເກີດກິນເບຍຊຸມແຊວກັນຢູ່.

    ຂ່າວລາຍງານວ່າ ຄືນວັນທີ 02 ກັນຍາ 2021ນີ້ ຄະນະສະເພາະກິດພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນຳໂດຍ ທ່ານ ສົມສັກ ວຽງວິໄລ ຮອງຫົວໜ້າແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງບໍ່ແກ້ວ ພ້ອມດ້ວຍຄະນະ ແລະ ເຈົ້າໜ້າທີ່ທະຫານແຂວງ ໄດ້ລົງເຄື່ອນໄຫວ ກວດກາບັນດາຫົວໜ່ວຍທຸລະກິດຮ້ານ ບໍລິການອາຫານ ແລະ ເຄື່ອງດື່ມ ພາຍໃນເທດສະບານເມືອງຫ້ວຍຊາຍ ແຂວງບໍ່ແກ້ວ.

    ການລົງກວດດັ່ງກ່າວເປັນການຊຸກຍູ້ບັນດາຫົວໜ່ວຍທຸລະກິດ ການບໍລິການອາຫານ ແລະ ເຄື່ອງດື່ມໃນເທດສະບານເມືອງຫ້ວຍຊາຍ – ເຂດພັດທະນາດ່ານຖິ່ນ, ເຂດບ້ານພັດທະນາບ້ານປຸງນາໜູນ ເຊິ່ງເປັນເຂດທີ່ນອນພາຍໃນເທດສະບານແຂວງ, ໃນການຈັດຕັ້ງປະຕິບັດມາດຕະການຕ່າງໆ ຂອງບັນດາຫົວໜ່ວຍທຸລະກິດບໍລິການຮ້ານອາຫານ, ຮ້ານກິນດື່ມ ຮ້ານບັນເທີງ, ຮ້ານຄາຮາໂອເກະ ແລະ ຄອບຄົວ .

    ຜ່ານການຕິດຕາມກວດກາພົບເຫັນວ່າ: ຍັງມີບາງຮ້ານ ,ຈຳໜ່າຍເຄື່ອງດື່ມທີມີທາດເຫຼົ້າ, ມີບາງຄອບຄົວຍັງຈັດງານວັນເກີດ, ງານສັງສັນ ມີລັກສະນະແບບຊຸມແຊວເປັນຈໍານວນຄົນຫຼາຍ ,ບໍ່ປະຕິບັດຕາມແຈ້ງການຄໍາແນະນໍາ ຂອງຄະນະສະເພາະກິດຂັ້ນສູນກາງ-ກະຊວງ, ແຂວງ ແລະ ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ວ່າດ້ວຍການປິດຮ້ານຊົ່ວຄາວ ໃນການບໍລິການ ເຫຼົ້າ-ເບຍໃຫ້ແກ່ສັງຄົມ ໃນໄລຍະການລະບາດຂອງພະຍາດໂຄວິດ-19.


    ຕໍ່ກັບບັນຫາດັ່ງກ່າວ ໃນເບື້ອງຕົ້ນຄະນະສະເພາະກິດ ກໍໄດ້ແນະນຳ ແລະ ກ່າວເຕືອນເຈົ້າຂອງກິດຈະການ,ຄອບຄົວ ຖ້າຫາກຍັງມີການລະເມີດຄັ້ງຕໍ່ໄປ ທາງຄະນະຮັບຜິດຊອບຈະໄດ້ປະຕິບັດຕາມລະບຽບການຢ່າງເຂັ້ມງວດ ໂດຍບໍ່ມີການຍົກເວັ້ນບໍ່ວ່າຈະເປັນພາກສວນໃດກໍ່ຕາມ ເຊິ່ງຕ້ອງເຂົ້າໃຈນຳກັນວ່າ ທັງໝົດນີ້ກໍເພື່ອເປັນການຫລຸດຜ່ອນ ແລະ ຢັບຢັ້ງໃນການແຜ່ລະບາດຂອງເຊື້ອພະຍາດໂຄວິດ-19