ໄປບໍ່ລອດ! ບ່າວກຳມະກອນ ລັກເງິນນາຍຈ້າງ ມ້າງເອົາຢູ່ໃນຕູ້ເຊັບ

    0
    101

    ໃນວັນທີ 4 ສິງຫາ 2021 ເຈົ້າໜ້າທີ່ພະແນກຕໍາຫຼວດ ປກສ ເມືອງ ສີໂຄດຕະບອງ ໄດ້ກັກຕົວ ທ້າວ ນົກ ອາຍຸ 26 ປີ, ອາຊີບກໍາມະກອນ, ບ້ານ ຫ້ວຍແກ້ວ ເມືອງ ຄໍາເກີດ ແຂວງ ບໍລິຄໍາໄຊ ເຮັດວຽກຢູ່ຮ້ານຂອງ ນາງ ດາວັນ, ໃນຂໍ້ຫາລັກຊັບພົນລະເມືອງ (ລັກຕູ້ເຊັບ) ມີເງິນ 7.000.000 ກີບ, 14.000 ຢວນ ແລະ 350 ໂດລາ, ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍ.

    (ພາບປະກອບ)

    ຜ່ານການສອນສວນຜູ້ກ່ຽວຮັບສາລະພາບວ່າ: ພາຍຫຼັງນາຍຈ້າງອອກຈາກຮ້ານໄປວຽກນອກ ໄດ້ປະແຕ່ລູກ 2 ຄົນ ໄວ້ນໍາຕົນເອງ, ໃນເວລາປະມານ 17:00 ໂມງ ຂອງວັນທີ 2 ກັນຍາ 2021, ຕົນສັງເກດເຫັນປະຕູຫ້ອງບໍ່ໄດ້ລ໋ອກ, ຈຶ່ງເຂົ້າໄປເບິ່ງແລ້ວລັກເອົາຕູ້ເຊັບ ນໍາໄປເຊື່ອງໄວ້ປ່າແຖວໃກ້ເຮືອນ ຮອດເວລາ 20:00 ໂມງ, ນາຍຈ້າງກັບມາເຮືອນແລ້ວບໍ່ເຫັນຕູ້ເຊບຈິ່ງໄດ້ແຈ້ງຄວາມຕໍ່ເຈົ້າໜ້າທີ່,

    (ພາບປະກອບ)

    ຮອດເວລາ 01:00 ໂມງ ຂອງວັນທີ 4 ກັນຍາ 2021 ຕົນໄດ້ຊອກເຫຼັກໄປງັດຕູ້ເຊັບແລ້ວເອົາເງິນໄປຊຸກເຊື່ອງໄວ້ຄອກໝູ ໂດຍບໍ່ໄດ້ນັບຈຳນວນເງິນ, ຮອດເວລາປະມານ 10:00 ໂມງ ຂອງວັນດຽວກັນເຈົ້າໜ້າທີ່ ຈຶ່ງໄດ້ກັກຕົວ ແລະ ຕົນໄດ້ພາເຈົ້າໜ້າທີ່ໄປເອົາເງິນທີ່ຊຸກເຊື່ອງໄວ້ຢູ່ບ່ອນດັ່ງກ່າວ.

    ຄະດີດັ່ງກ່າວ, ເຈົ້າໜ້າທີ່ພວມດຳເນີນຕາມຂັ້ນຕອນຂອງກົດໝາຍ. ສ່ວນເງິນທີ່ເກັບກູ້ໄດ້ຄືນວັນທີ 6 ກັນຍາ 2021 ເຈົ້າໜ້າທີ່ ປກສ ເມືອງ ສີໂຄດຕະບອງ ໄດ້ນຳເງິນດັ່ງກ່າວມອບຄືນໃຫ້ຜູ້ເສຍຫາຍແລ້ວ, ຕາງໜ້າມອບໂດຍ ພັທ ຄຳປ່ຽນ ອຸດົມວິໄລ ຫົວໜ້າພະແນກຕຳຫຼວດ ປກສ ເມືອງ ສີໂຄດຕະບອງ ຕາງໜ້າຮັບໂດຍ ນາງ ດາວັນ ເຈົ້າຂອງຊັບ.

    +ຂ່າວຈາກ: ປກສ ນວ.