ດີໃຈນຳຊາວບ້ານພູຊ້າງ 200 ກວ່າຄອບຄົວ ມີໃບຕາດິນນໍາໃຊ້ຖືກຕ້ອງຕາມລະບຽບກົດໝາຍແລ້ວ

    0
    14

    ໃບຕາດິນ ເປັນສິ່ງຢັ້ງຢືນຄວາມເປັນເຈົ້າຂອງຊັບສິນທີ່ມີຄ່າ ແລະມີຜົນທາງກົດໝາຍ ປະຊາຊົນລາວທຸກຄົນທີ່ຄອບຄອງທີ່ດິນຕ້ອງມີໃບກຳມະສິດທີ່ດິນ ເປັນຢັ້ງຢືນວ່າເຮົາເປັນເຈົ້າຂອງແທ້ ສາມາດນຳໃຊ້ ແລະມອບໂອນກຳມະສິດໄດ້ ດັ່ງນັ້ນໃບຕາດິນຈິ່ງມີຄວາມສຳຄັນຫຼາຍ ແຕ່ປະຊາຊົນຈຳນວນບໍ່ໜ້ອຍໃນປະເທດເຮົາແມ່ນຍັງບໍມີໃບຕາດິນຍ້ອນຫຼາຍບັນຫາ.

    ແນວມດກໍ່ຕາມບັນຫານີ້ແມ່ນລັດໄດ້ມີແນວທາງແກ້ໄຂໃຫ້ໄປເທື່ອລະໜ້ອຍ, ຫຼ້າສຸດນີ້ວັນທີ 9 ພະຈິກ 2021 ຫ້ອງການຊັບພະຍາກອນທຳມະຊາດ ແລະ ສີ່ງແວດລ້ອມເມືອງຊຽງເງິນ ແຂວງຫຼວງພະບາງ ໄດ້ສົມທົບກັບບ້ານພູຊ້າງ ເມືອງຊຽງເງິນ ດຳເນີນພິທີມອບ-ຮັບໃບຕາດິນໃຫ້ເຈົ້າຂອງສິດນຳໃຊ້ທີ່ດິນ, ຢູ່ສະໂມສອນບ້ານພູຊ້າງ, ໂດຍການເຂົ້າຮ່ວມຂອງ ທ່ານ ພູເງິນ ອຸດສະຫະ ຮອງເຈົ້າເມືອງຊຽງເງິນ, ມີ ທ່ານ ໄກທອງ ສີສົມບຸນ ຫົວໜ້າຫ້ອງການຊັບ ພະຍາກອນທຳມະຊາດ ແລະ ສີ່ງແວດລ້ອມ ເມືອງຊຽງເງິນ, ມີທ່ານ ນາຍບ້ານພູຊ້າງ, ຕາງໜ້າບໍລິສັດເຂື່ອນໄຟຟ້ານ້ຳຄານ 2-3 ພ້ອມດ້ວຍປະຊາຊົນເຂົ້າຮ່ວມ.

    ທ່ານ ໄກທອງ ສີສົມບຸນ ຫົວໜ້າຫ້ອງການຊັບ ພະຍາກອນທຳມະຊາດ ແລະສີ່ງແວດລ້ອມ ເມືອງຊຽງເງິນໄດ້ກ່າວວ່າ: ພູຊ້າງເປັນບ້ານໜຶ່ງທີ່ໄດ້ຮັບຜົນກະທົບຈາກການສ້າງເຂື່ອນໄຟຟ້ານ້ຳຄານ 2 ມີບ້ານທີ່ຖືກຍົກ ຍ້າຍຈັດສັນຈຳນວນ 5 ບ້ານຄື: ບ້ານໜອງດີ, ສະມຸ່ຍ, ບໍ່ຊືນ, ບ້ານດ່ານ ແລະ ບ້ານສົບຈຸນ, ດັ່ງນັ້ນພັກ ແລະລັດຖະບານຈຶ່ງມີແນວທາງແຜນນະໂຍບາຍ ເຫັນໄດ້ຄວາມສໍາຄັນໃນການພັດທະນາໂຄງການ, ພື້ນຖານໂຄງລ່າງຂອງບ້ານ ໃນການດຳລົງຊີວິດຂອງປະຊາຊົນໃນອະນາຄົດ.

    ສະນັ້ນຈຶ່ງໄດ້ໂຮມເອົາ 5 ບ້ານເປັນບ້ານດຽວໃນປີ 2012 ຫາ 2015 ເອີ້ນຊື້ວ່າ ບ້ານພູຊ້າງ. ໃນນີ້ມີຄອບຄົວທັງໝົດ 349 ຄອບຄົວ, ພົນລະເມືອງ 1.960 ຄົນ, ຍິງ 980 ຄົນເປັນບ້ານປະສົມປະສານຢູ່ຮ່ວມກັນ 3 ຊົນເຜົ່າຄື: ເຜົ່າລາວ, ກຶມມຸ ແລະ ເຜົ່າມົ້ງ, ອາຊີບສ່ວນໃຫຍ່ແມ່ນປູກຝັງ-ລ້ຽງສັດ, ການປະມົງ ແລະ ຄ້າຂາຍ.

    .

    ຜ່ານການລົງສຳຫຼວດ-ວັດແທກພິສູດຫຼັກຖານຂຶ້ນທະບຽນອອກໃບຕາດິນຢ່າງເປັນລະບົບໂດຍເລີ່ມປະຕິບັດມາແຕ່ວັນທີ 21 ມີນາ 2019 ຫາ ວັນທີ 5 ເມສາ 2019 ຈຶ່ງສຳເລັດສາມາດສະຫຼຸບໄດ້ທັງໝົດ 380 ຕອນ, ທຽບໃສ່ແຜນການປີ 360 ຕອນ ປະຕິບັດໄດ້ 105,56% ເກີນແຜນ 5,5%, ໃນນັ້ນມີທີ່ດິນບຸກຄົນ 374 ຕອນ, ດິນລວມໝູ່ 6 ຕອນ ແລະ ທີ່ດິນເຈົ້າຂອງສິດບໍ່ມາແຈ້ງ 4 ຕອນ

    .

    ໃນນີ້ໄດ້ອອກໃບຕາດິນແລ້ວ ແລະ ນຳໄປມອບໃຫ້ເຈົ້າຂອງສິດນຳໃຊ້ທີ່ດິນມີທັງໝົດ 279 ຕອນ, ຍັງອີກ 101 ຕອນ ແມ່ນຍັງເຮັດບໍ່ທັນສໍາເລັດ