ເຄຍທຸກປະເດັນ ກໍລະນີມີສຽງຍິງປຶ່ງໆຢູ່ທ່າແຂກ

    0
    21

    ເປັນຂ່າວໂດງດັງໃນສື່ອອນລາຍກ່ຽວກັບເຫດການຍິງລົດທີ່ເກີດຂຶ້ນໃນວັນທີ 9 ພະຈິກຜ່ານມາທີ່ທ່າແຂກ ຫຼາຍຄົນກໍ່ຈົດຈໍ່ຢາກຟັງການຖະແຫຼງຈາກເຈົ້າໜ້າທີ່ວ່າແມ່ນເກີດຫຍັງກັນແທ້ ມື້ນີ້ໄດ້ຄຳຕອບແລ້ວທີ່ຈີງແມ່ນການປະຕິບັດວາລະແຫ່ງຊາດນັ້ນເອງ.

    ທ່ານ ພັທ ພົມມະລາ ບົວລະພາ ຫົວໜ້າກອງບັນຊາການ ປກສ ເມືອງທ່າແຂກ, ແຂວງຄຳມ່ວນ ໄດ້ຖະແຫຼງການ ຊີ້ແຈງກ່ຽວກັບເຫດການ ທີ່ເກີດຂຶ້ນຢູ່ເສັ້ນທາງເລກທີ 13 ໃຕ້ ເຂດບ້ານນາບວບ ເມືອງທ່າແຂກ ແຂວງຄຳມ່ວນໃນຄັ້ງວັນທີ 09 ພະຈິກ 2021 ໃຫ້ຮູ້ວ່າ: ເຊິ່ງເຫດການດັ່ງກ່າວ ແມ່ນເປັນການປະຕິບັດໜ້າທີ່ຂອງເຈົ້າໜ້າທີ່ຕຳຫຼວດຕ້ານ ແລະ ສະກັດກັ້ນຢາເສບຕິດ ປກສ ເມືອງທ່າແຂກ ແຂວງຄຳມ່ວນ, ເຂົ້າສະກັດກັ້ນລົດຜູ້ຕ້ອງສົງໄສຄ້າຢາ ເຊິ່ງເຫດການດັ່ງກ່າວ ທາງເຈົ້າໜ້າທີ່ຕຳຫຼວດ ສາມາດກັກຕົວຜູ້ຖືກຫາໄດ້ 03 ຄົນ, ຍິງ 01 ຄົນ. ແລະ ເດັກ 01 ຄົນ. ຢືດຂອງກາງຢາ 210 ເມັດ, ໂທລະສັບ ຈຳນວນ 04 ໜ່ວຍ ພ້ອມດ້ວຍ ລົດເກັງ ຢີ່ຫໍ້ອີ່ແລນຕ້າ ສີດຳ ບໍ່ມີປ້າຍທະບຽນ 01 ຄັນ ແລະ ເຄື່ອງຂອງກາງອີກຈຳນວນໜຶ່ງ.


    ຕໍ່ກັບເຫດການດັ່ງກ່າວ ທ່ານ ພັທ ພົມມາລາ ບົວລະພາ ຫົວໜ້າກອງບັນຊາການ ປກສ ເມືອງທ່າແຂກ ແຂວງຄຳມ່ວນໄດ້ຊີ້ແຈງໃຫ້ຮູ້ວ່າ: ເຫດການທີ່ເກີດຂຶ້ນຢູ່ເສັ້ນທາງເລກທີ 13 ໃຕ້ ຫ່າງຈາກຕົວເມືອງທ່າແຂກ ໄປທາງທິດໃີຕ້ 08 ກິໂລແມັດ ຢູ່ເຂດບ້ານນາບວບ, ເມືອງທ່າແຂກ, ແຂວງຄຳມ່ວນ. ເຊິ່ງເຫດການດັ່ງກ່າວແມ່ນເປັນການປະຕິບັດໜ້າທີ່ຂອງເຈົ້າໜ້າທີ່ ປກສ ເມືອງທ່າແຂກ ແຂວງຄຳມ່ວນ, ເຂົ້າສະກັດກັ້ນລົດຜູ້ຕ້ອງສົງໄສຄ້າຢາ ໂດຍອີງຕາມການລາຍງານຂອງພົນລະເມືອງດີໄດ້ລາຍງານໃຫ້ເຈົ້າໜ້າທີ່ ປກສ ເມືອງທ່າແຂກ ໃຫ້ຮູ້ວ່າ: ມີເປົ້າໝາຍຂົນສົ່ງ,ຈຳໜ່າຍຢາ.

    ດັ່ງນັ້ນເຈົ້າໜ້າທີ່ຕຳຫຼວດ ກອງບັນຊາການ ປກສ ເມືອງທ່າແຂກ ຈຶ່ງໄດ້ຈັດຕັ້ງກຳລັງໜ່ວຍງານວິຊາສະເພາະລົງກວດກາຕິດຕາມ. ຮອດເວລາ 15:30ໂມງ ຂອງວັນທີ 09 ພະຈິກ 2021 ຈິ່ງໄດ້ພົບເຫັນເປົ້າໝາຍທີ່ນຳໃຊ້ພາຫະນະ ປະເພດລົດເກັງ ຍີຫໍ້ ອີແລນຕາ ສີດຳ ບໍ່ຕິດປ້າຍທະບຽນ ຈອດຢູ່ແຄມທາງເລກທີ 13 ໃຕ້, ເມືື່ອເປັນເຊັ່ນນັ້ນ ຈຶ່ງໄດ້ນຳໃຊ້ກຳລັງ ແລະ ພາຫະນະເຂົ້າປິດລ້ອມ ເພື່ອທຳການກວດກາ ແຕ່ເປົ້າໝາຍບໍ່ໃຫ້ຄວາມຮ່ວມມືກັບເຈົ້າໜ້າທີ່ຕຳຫຼວດ ຂອງພວກເຮົາ ແລ້ວຍັງໄດ້ຂັບຂີ່ລົດອອກຈາກວົງປິດລ້ອມ ໃນຂະນະທີ່ຜູ້ຕ້ອງສົງໄສຂັບຂີ່ລົດ ອອກຈາກວົງປິດລ້ອມ ໄດ້ໄປຕຳກັບລົດຂອງເຈົ້າໜ້າທີ່່ຕຳຫຼວດ 02 ຄັນ ເຊິ່ງເຮັດໃຫ້ລົດຂອງທາງເຈົ້າໜ້າທີ່ ເປ່ເພພໍສົມຄວນ.

    ດັ່ງນັ້ນທາງເຈົ້າໜ້າທີ່ຕຳຫຼວດ ຈຶ່ງໄດ້ນຳໃຊ້ອາວຸດປືນຍິງໃສ່ຢາງລໍ້ຫຼັງລົດຂອງຜູ້ຕ້ອງສົງໄສ ເຊິ່ງໄດ້ເຮັດໃຫ້ຢາງລົດຂອງຜູ້ຕ້ອງສົງໄສແຕກ ແຕ່ຜູ້ຕ້ອງສົງໄສຍັງພະຍາຍາມຂັບຂີ່ລົດຂອງຜູ້ກ່ຽວລົບໜີ ໄປທາງທິດໃຕ້ ຈາກນັ້ນເຈົ້າໜ້າທີ່ຂອງພວກເຮົາກໍ່ ໄດ້ຂັບຂີ່ລົດຕິດຕາມ ແລ້ວໄປທັນລົດຜູ້ຕ້ອງສົງໄສ ຢູ່ເຂດບ້ານດົງກະແສນ ເມືອງທ່າແຂກ ແຂວງຄຳມ່ວນ ຫ່າງຈາກຈຸດເກີດເຫດປະມານ 12 ກິໂລແມັດ, ຜູ້ຕ້ອງສົງໄສຈຶ່ງໄດ້ຈອດລົດເພື່ອທີ່ຈະເອົາຕົວຫຼົບໜີ ແຕ່ຫຼົບໜີບໍ່ລອດ ຖືກເຈົ້າໜ້າທີ່ຕຳຫຼວດຂອງພວກເຮົາ ຈັບໄດ້ ເຊິ່ງມີຜູ້ຖືກຫາ 03 ຄົນ,ຍິງ 01 ຄົນ ແລະ ເດັກ 01 ຄົນ. ພ້ອມຂອງກາງ 210 ເມັດ ,ໂທລະສັບ 04 ໜ່ວຍ, ລົດເກັງ ຢີ່ຫໍ້ ອີແລນຕ້າ ສີດຳ ບໍ່ມີປ້າຍທະບຽນ 01 ຄັນ.


    ຜ່ານການສືບສວນ-ສອບສວນເບື້ອງຕົ້ນຂອງເຈົ້າໜ້າທີ່ຕຳຫຼວດ ຈຶ່ງຮູ້ວ່າຜູ້ຖືກຫາຜູ້ທີໜຶ່ງ ຊືື່ວ່າ ທ້າວ ວັນນະເລດ ວົງດາລາ (ຕະ) ອາຍຸ 29 ປີ, ອາຊີບກຳມະກອນ, ຜູ້ຖືກຫາຜູ້ທີສອງ ຊື່ນາງ ແຄັດຕີ້ ອາຍຸ 20 ປີ, ອາຊີບຄ້າຂາຍ ແລະ ຜູ້ທີ່ສາມເປັນເດັກ ທັງສາມແມ່ນຢູ່ບ້ານ ທ່າແຂກໃຕ້, ເມືອງທ່າແຂກ, ແຂວງຄຳມ່ວນ.

    ຕໍ່ກັບເຫດການທີ່ເກີດຂຶ້ນແມ່ນໄດ້ສ້າງຄວາມບໍ່ເຂົ້າໃຈຕໍ່ສັງຄົມ ຍ້ອນເຫດການດັ່ງກ່າວອອກທາງ ຊື່ສັງຄົມອອນລາຍ ແຕ່ເຖິງຢ່າງໃດກໍ່ຕາມທາງເຈົ້າໜ້າທີ່ຕຳຫຼວດກອງບັນຊາການ ປກສ ເມືອງທ່າແຂກ ຂອງພວກເຮົາ ຈິ່ງຂໍຊີ້ແຈງວ່າເຫດການດັ່ງກ່າວ ແມ່ນເປັນການປະຕິບັດໜ້າທີ່ເພື່ອສະກັດກັ້ນ ກັບ ພວກຂົນສົ່ງ,ຄ້າຂາຍຢາເສບຕິດ. ປະຈຸບັນທາງເຈົ້າໜ້າທີ່ຕຳຫຼວດຍັງສືບສວນ-ສອບສວນເພື່ອຂະຫຍາຍຜົນຫາ ພວກກຸ່ມແກ໋ງຮ່ວມຂະບວນການ ທີ່ມີສ່ວນພົວພັນມາດຳເນີນຄະດີຕາມລະບຽບກົດໝາຍ.