ປະທານປະເທດ ທອງລຸນ ສີສຸລິດ ຮ່ວມກອງປະຊຸມສຸດຍອດອາຊຽນ-ຈີນ ສະໄໝພິເສດ ສະຫຼອງການຮ່ວມມື 30 ປີ

    0
    36

    ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ນໍາພາຄະນະເຂົ້າຮ່ວມກອງປະຊຸມສຸດຍອດ ອາຊຽນ-ຈີນ ສະໄໝພິເສດ ເພື່ອສະເຫຼີມສະຫຼອງການພົວພັນຮ່ວມມື ອາຊຽນ-ຈີນ ຄົບຮອບ 30 ປີ ໃນຮູບແບບທາງໄກ, ພາຍໃຕ້ການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮາຊານັນ ໂບນເກຍ ແຫ່ງ ບຣູໄນ ດາຣູຊາລາມ ແລະ ທ່ານ ສີ ຈິ້ນຜິງ ປະທານປະເທດແຫ່ງ ສປ ຈີນ ໃນວັນທີ 22 ພະຈິກ ທີ່ຫໍປະຊຸມແຫ່ງຊາດ.


    ກອງປະຊຸມ ໄດ້ທົບທວນຄືນ ແລະ ຕີລາຄາສູງຕໍ່ການຮ່ວມມືອາຊຽນ-ຈີນ ຕະຫຼອດໄລຍະ 30 ປີ ຜ່ານມາ ຊຶ່ງເຫັນໄດ້ເຖິງການຂະຫຍາຍຕົວ ແລະ ກ້າວເຂົ້າສູ່ຂີດໝາຍສຳຄັນ ໂດຍສະເພາະການຍົກລະດັບການພົວພັນຮ່ວມມື ອາຊຽນ-ຈີນ ຂຶ້ນເປັນຄູ່ຮ່ວມຍຸດທະສາດຮອບດ້ານຢ່າງເປັນທາງການ ທີ່ສ່ອງແສງໃຫ້ເຫັນຄວາມໝາຍໝັ້ນທາງດ້ານການເມືອງ ຂອງ ອາຊຽນ-ຈີນ ເພື່ອປະກອບສ່ວນເຂົ້າໃນການປົກປັກຮັກສາສັນຕິພາບ ແລະ ສະຖຽນລະພາບ ກໍຄືການຮ່ວມມືເພື່ອການພັດທະນາ ໃນພາກພື້ນ ແລະ ໃນໂລກ. ຕະຫຼອດໄລຍະ 3 ທົດສະວັດຜ່ານມາ, ອາຊຽນ ແລະ ສປ ຈີນ ໄດ້ປະສົບຜົນສໍາເລັດທີ່ພົ້ນເດັ່ນຫຼາຍ ໂດຍສະເພາະມູນຄ່າການຄ້າສອງຝ່າຍ ໄດ້ເພີ່ມຂຶ້ນຫຼາຍກວ່າ 80% ຖ້າທຽບໃສ່ໃນປີ 1991; ການແລກປ່ຽນວັດທະນະທຳ ແລະ ການໄປມາຫາສູ່ຂອງປະຊາຊົນ ແລະ ການຮ່ວມມືດ້ານອື່ນໆກໍໄດ້ຮັບການເສີມຂະຫຍາຍເປັນກ້າວໆ.


    ບັນດາຜູ້ນຳອາຊຽນ ໄດ້ສະແດງຄວາມຍິນດີທີ່ ສປ ຈີນ ໄດ້ໃຫ້ຄຳໝາຍໝັ້ນທີ່ຈະສືບຕໍ່ໃຫ້ການຊ່ວຍເຫຼືອອາຊຽນ ໃນການຮ່ວມມືເພື່ອຕ້ານກັບພະຍາດໂຄວິດ-19, ສືບຕໍ່ໃຫ້ການຊ່ວຍເຫຼືອອາຊຽນ ໂດຍການປະກອບສ່ວນເຂົ້າໃນກອງທຶນອາຊຽນ ເພື່ອຮັບມືກັບພະຍາດໂຄວິດ-19; ການຮ່ວມມືດ້ານສາທາລະ ນະສຸກ ໂດຍສະເພາະການຄົ້ນຄວ້າຢາປິ່ນປົວ, ການສ້າງບຸກຄະລາກອນດ້ານສາທາລະນະສຸກ ແບບຄົບຊຸດ. ສືບຕໍ່ການແລກປ່ຽນການຮ່ວມມືດ້ານວັດທະນະທຳ-ສັງຄົມ; ພິຈາລະນາເປີດການໄປມາຫາສູ່ຂອງປະຊາຊົນ, ການໃຫ້ທຶນການສຶກສາສຳລັບນັກຮຽນອາຊຽນ ໄປຮຽນຢູ່ ສປ ຈີນ; ການຮ່ວມມືດ້ານຊາວໜຸ່ມ, ແມ່ຍິງ ແລະ ກິລາ.

    ນອກນັ້ນ, ກອງປະຊຸມຍັງໄດ້ປຶກສາຫາລື ກ່ຽວກັບທິດທາງການຮ່ວມມືໃນອະນາ ຄົດ ໂດຍສະເພາະການຟື້ນຟູເສດຖະກິດພາກພື້ນ ຜ່ານການເຊື່ອມໂຍງເຊື່ອມຈອດດ້ານການຄ້າ-ການລົງ ທຶນ ໂດຍການສືບຕໍ່ຈັດຕັ້ງປະຕິບັດຖະແຫຼງການອາຊຽນ-ຈີນ ວ່າດ້ວຍການເຊື່ອມສານລະຫວ່າງ ແຜນແມ່ບົດການເຊື່ອມຈອດອາຊຽນ 2025 ແລະ ຂໍ້ລິເລີ່ມໜຶ່ງແລວ, ໜຶ່ງເສັ້ນທາງ ແລະ ແລວທາງການຄ້າທາງບົກ-ທາງທະເລ ສາກົນໃໝ່ຂອງຈີນ; ການສົ່ງເສີມ ແລະ ພັດທະນາຂີດຄວາມສາມາດດ້ານເສດຖະ ກິດດີຈີຕອນ ແລະ ນະວັດຕະກຳ ເປັນຕົ້ນແມ່ນການນໍາໃຊ້ເຕັກໂນໂລຊີທີ່ທັນສະໄໝເຂົ້າໃນຂົງເຂດການຄ້າ, ການເງິນ, ການທະນາຄານ ແລະ ການສ້າງຄວາມເຂັ້ມແຂງ ໃຫ້ແກ່ຈຸລະວິສາຫະກິດ ແລະ ວິສາຫະກິດຂະ ໜາດນ້ອຍ-ຂະໜາດກາງ.


    ກອງປະຊຸມໄດ້ຮັບຮອງເອົາຖະແຫຼງການຮ່ວມ ຂອງກອງປະຊຸມສຸດຍອດອາຊຽນ-ຈີນ ສະໄໝພິເສດ ເພື່ອສະເຫຼີມສະຫຼອງການພົວພັນຮ່ວມມື ອາຊຽນ-ຈີນ ຄົບຮອບ 30 ປີ (Joint Statement of the ASEAN-China Special Summit to Commemorate the 30th Anniversary of ASEAN-China Dialogue Relations).