ລັດຖະບານຍີ່ປຸ່ນຊ່ວຍເຫຼືອພາຫະນະ ເພື່ອນຳໃຊ້ເຂົ້າໃນວຽກງານຄຸ້ມຄອງໄພພິບັດ 18 ແຂວງທົ່ວປະເທດ ມູນຄ່າ 1 ຕື້ເຢັນ

    0
    88

    ພິທີມອບ-ຮັບພາຫະນະ ແລະ ອຸປະກອນຊ່ວຍເຫຼືອລ້າຈາກລັດຖະບານຍີ່ປຸ່ນ ພາຍໃຕ້ໂຄງການນອກໂຄງການ ຈັດຂຶ້ນວັນທີ 24 ສິງຫາ 2022 ທີ່ສາງເຄື່ອງອຸປະໂພກ-ບໍລິໂພກ (ດົງໝາກຄາຍ) ກ່າວມອບໂດຍ ທ່ານ ໂຄບະຍະຊິ ເຄັນອິຈິ ເອກອັກຄະຣາຊາທູດຍີ່ປຸ່ນປະຈໍາລາວ ກ່າວຮັບໂດຍ ທ່ານ ນາງ ໃບຄໍາ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ (ຮສສ) ມີບັນດາທ່ານຮອງລັດຖະມົນຕີ, ທ່ານຜູ້ປະສານງານຄະນະກໍາມະການຄຸ້ມຄອງໄພພິບັດ ຫົວໜ້າພະແນກ ຮອງພະແນກ ຮສສ 18 ແຂວງທົ່ວປະເທດເຂົ້າຮ່ວມ.

    ໂດຍປະຕິບັດຕາມເອກະສານໂຄງການແລກປ່ຽນລະຫວ່າງສອງລັດຖະບານ ສປປ ລາວ ແລະ ສະຖານທູດຍີ່ປຸ່ນ ປະຈໍາ ສປປ ລາວ ໂດຍມອບໃຫ້ ກະຊວງແຮງງານ ແລະ ສະຫວັດດີການສັງຄົມ (ຮສສ) ຕາງໜ້າລັດຖະບານໃນການລົງນາມຮັບເອົາການຊ່ວຍເຫຼືອເຊິ່ງເປັນໂຄງການຊ່ວຍເຫຼືອນອກໂຄງການ ເຊິ່ງກົມສັງຄົມສົງເຄາະໃນນາມຕາງໜ້າກະຊວງ ຮສສ ປະສານສົມທົບກັບ ແລະ ບໍລິສັດ ຄາວຣ (Crown Agents) ເຊິ່ງເປັນບໍລິສັດທີ່ລັດຖະບານຍີ່ປຸ່ນມອບໃຫ້ເປັນຜູ້ຕາງໜ້າລັດຖະບານຍີ່ປຸ່ນໃນການຈັດຊື້ພາຫະນະ-ອຸປະກອນກຽມພ້ອມ ແລະ ຕອບໂຕ້ໄພພິບັດພາຍໃຕ້ໂຄງການຊ່ວຍເຫຼືອນອກໂຄງການ ( ເປັນໂຄງການຊ່ວຍເຫຼືອ) ມູນຄ່າທັງໝົດ 1 ຕື້ເຢນ.

    ໃນນັ້ນ, ມີລົດກະບະໂຟວິນ 20 ຄັນ ພ້ອມອາໄຫຼ່ 20 ຊຸດ ລົດໂຮງໝໍ ໂຟວິນ 11 ຄັນ ພ້ອມອາໄຫຼ່ 6 ຊຸດ ລົດບັນທຸກເຄື່ອງຊ່ວຍເຫຼືອ 18 ຄັນ ພ້ອມອາໄຫຼ່ລົດ 18 ຊຸດ ລົດໂຟກລິບ 2 ຄັນ ພ້ອມອາໄຫຼ່ 2 ຊຸດ ເຕັ້ນຊຸມຊົນ 30 ດາງ ພ້ອມອງໄຫຼ່ 30 ຊຸດ ຜ້າບັດ 200 ອັນ ເຕັ້ນຄອບຄົວ 300 ດາງ ພ້ອມອາໄຫຼ່ເຕັ້ນ 300 ຊຸດ ເຮືອກູ້ໄພ 100 ລໍາພ້ອມອາໄຫຼ່ 100 ຊຸດ ຈັກຕິດທ້າຍເຮືອ 100 ຊຸດ ລໍ້ລາກເຮືອ 52 ຄັນ ເຄື່ອງກອງນໍ້າແບບຕິດລົດບັນທຸກ 3 ຄັນ ພ້ອມອາໄຫຼ່ສໍາຮອງ ເຄື່ອງກອງນໍ້າຄົບຊຸດ 2 ຊຸດ ເຄື່ອງກອງນໍ້າແບບຄົວເຮືອນ 300 ອັນ ພ້ອມ ໃສ້ກອງນໍ້າສໍາຮອງ 600 ຊຸດ ລົດຈັກ 5 ຄັນ ບັນດາພາຫະນະ ແລະ ອຸປະກອນທີ່ກ່າວມານີ້ມີບາງພາຫະນະ ແລະ ອຸປະກອນແມ່ນໄດ້ສໍາເລັດໃນການ ປະມູນຈັດຊື້ຈາກລັດຖະບານຍີ່ປຸ່ນ ແລະ ຍັງມີບາງພາຫະນະ ແລະ ອຸປະກອນຈຳນວນໜຶ່ງຍັງຢູ່ໃນຂະບວນການປະມູນຈັດຊື້ຂອງລັດຖະບານຍີ່ປຸ່ນ ແລະ ຈະໄດ້ສືບຕໍ່ໃນການຈັດຕັ້ງປະຕິບັດການຈັດຊື້ໃຫ້ສໍາເລັດໃນທ້າຍປີ.

    ໂອກາດນີ້, ທ່ານນາງ ໃບຄຳ ຂັດທິຍະ ໃນນາມຕາງໜ້າລັດຖະບານ ສປປ ລາວ ໄດ້ສະແດງຄວາມຂອບໃຈຢ່າງຈິງໃຈມາຍັງລັດຖະບານ ແລະ ປະຊາຊົນຢີ່ປຸ່ນ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້, ເຊິ່ງເປັນການປະກອບສ່ວນທີ່ສໍາຄັນອັນໃຫຍ່ຫຼວງໃນການເສີມຂະຫຍາຍສາຍພົວພັນມິດຕະພາບລະຫວ່າງປະຊາຊົນສອງຊາດລາວ-ຢີ່ປຸ່ນໃຫ້ນັບມື້ນັບງອກງາມຂຶ້ນເລື້ອຍໆ, ພ້ອມນີ້ ທ່ານ ຍັງໄດ້ເນັ້ນຢຳໍ້ຈະພ້ອມກັນກັນປົກປັກຮັກສາ ແລະ ນໍາໃຊ້ເຂົ້າໃນວຽກງານຄຸ້ມຄອງໄພພິບັດໃຫ້ເກີດປະໂຫຍດສູງສຸດ, ຈາກນັ້ນລັດຖະມົນຕີໄດ້ມອບຕໍ່ໃຫ້ພະແນກ ຮສສ ທົ່ວປະເທດ ແລະ ຂະແໜງການກ່ຽວຂ້ອງອີກດ້ວຍ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.