ຍິນດີນຳ NAKHONE PICTURE ຈາກລາວ ທີ່ຊະນະເລີດການປະກວດ ຮູບເງົາສັ້ນຫົວໃຈແກ່ນ ທີ່ປະເທດໄທ ໄດ້

    0
    100

    ຈົບໄປແລ້ວ ສໍາລັບ ເທດສະການຮູບເງົາເມືອງແຄນ ຄັ້ງທີ 6  ທີ່ຈັດຂຶ້ນໃນລະຫວ່າງ ວັນທີ 24-28 ສິງຫາ 2022 ທີ່ ຈັງຫວັດ ຂອນແກ່ນ, ປະເທດໄທ ເຊິ່ງໃນປີນີ້ກໍມີຫຼາກຫຼາຍກິດຈະກໍາໃຫ້ມວນຊົນໄດ້ຮ່ວມມ່ວນຊື່ນ ເຊິ່ງໜຶ່ງໃນກິດຈະກໍາທີ່ນັກສ້າງຮູບເງົາໃຫ້ຄວາມສົນໃຈນັ້ນກໍຄື ກິດຈະກໍາການປະກວດ “ຮູບເງົາສັ້ນ ຫົວໃຈແກ່ນ” ໂດຍມີນັກສ້າງຮູບເງົາເຂົ້າຮ່ວມແຂ່ງຂັນທົງໝົດ 20 ທີມ ທີ່ໄດ້ຮັບການຄັດເລືອກຈາກຕົວຢ່າງໜັງທັງໝົດ 60 ທີມ, ທີ່ມາຈາກ ສປປ ລາວ 8 ທີມ ແລະ ຈາກປະເທດໄທ 12 ທີມ.

    ຜົນປະກົດວ່າ ທີມທີ່ສາມາດຍາດໄດ້ຊະນະເລີດ ແມ່ນທີມງານ NAKHONE PICTURE ຈາກ ສປປ ລາວ ໃນຜົນງານການສ້າງຮູບເງົາສັ້ນເລື່ອງ “Happy Birthday” (ສຸກສັນວັນເກີດ) ເຊິ່ງກໍາກັບໂດຍ: ສຸລິຍົງ ໄຊຍະວົງ, ເປັນຮູບເງົາແນວ ດຣາມາ ເຊິ່ງເນື້ອເລື່ອງເວົ້າເຖິງເດັກນ້ອຍຄົນໜຶ່ງທີ່ມີຄວາມຝັນຢາກເປັນ ນັກໄວໂອລິນ, ມາມື້ໜຶ່ງເກີດອຸປະຕິເຫດຕ້ອງກາຍເປັນຄົນພິການ ເຮັດໃຫ້ລາວໝົດກໍາລັງໃຈ, ແຕ່ດ້ວຍຄຳເວົ້າຂອງພໍ່ ແລະ ກໍາລັງໃຈຈາກຄອບຄົວ ເຮັດໃຫ້ລາວລຸກຂຶ້ນສູ້, ບໍ່ຍອມແພ້ກັບໂຊກສະຕາ ແລະ ກັບມາຫຼິ້ນໄວໂອລິນອີກຄັ້ງ.

    ຜູ້ກໍາກັບຮູບເງົາເລື່ອງດັ່ງກ່າວ ໄດ້ໃຫ້ຮູ້ວ່າ: ເລື່ອງນີ້ແມ່ນໄດ້ຮັບແຮງບັນດານໃຈມາຈາກ ຄອບຄົວທີ່ໃຫ້ຄວາມສໍາຄັນໃນວັນເກີດຂອງເຮົາເອງ ແລະ ເຮົາເອງກໍຫຼີ້ນດົນຕີ (ເປຍໂນ, ຮ້ອງເພງແຕ່ນ້ອຍ),ແລະ ທຸກຕອນຂຶ້ນເວທີ, ພໍ່ແມ່ຄອຍຢືນຢູ່ຂ້າງເວທີໃຫ້ກຳລັງໃຈເຮົາຕະຫຼອດ,ກໍເລີຍເລືອກດົນຕີເປັນຫົວໃຈຫຼັກຂອງເລື່ອງ.

    ໃນການຜະລິດຮູບເງົາສັ້ນເລື່ອງນີ້ ໃຊ້ໄວລາພຽງ 2 ມື້ໃນການຖ່າຍທຳ, ໃຊ້ເວລາຕັດຕໍ່ 6 ຊົ່ວໂມງ ເຊິ່ງຕ້ອງໄດ້ແຂ່ງກັບເວລາ ແລະ ພົບບັນຫາທ້າທາຍຫຼາຍຢ່າງ ເປັນຕົ້ນແມ່ນເລື່ອງສະຖານທີ່ ເພາະບໍ່ແມ່ນບ້ານເຮົາ ເຊິ່ງພວກເຮົາຕ້ອງໃຊ້ເວລາຫາສະຖານທີ່ ແລະ ນັກສະແດງປະກອບ ເພື່ອໃຫ້ງານອອກມາດີທີ່ສຸດ.

    ການຈັດງານເທດສະການຮູບເງົາເມືອງແຄນ ຄັ້ງທີ 6 ສະແດງໃຫ້ເຫັນການສົ່ງເສີມ ແລະ ສະໜັບສະໜູນອຸດສາຫະກໍາຮູບເງົາໃນພື້ນທີ່ພາກຕາເວັນອອກສ່ຽງເໜືອຂອງໄທ ແລະ ສປປ ລາວເຊິ່ງສະແດງໃຫ້ເຫັນເຖິງຄວາມເອົາໃຈໃສ່ ເຮັດໃຫ້ເກີດຄວາມໜ້າສົນໃຈໃນອຸດສະຫະກໍາຮູບເງົາ ພ້ອມທັງເປັນການສ້າງແຮງບັນດານໃຈ ແລະ ໂອກາດ ໃຫ້ກັບນັກສ້າງຮູບເງົາຮຸ່ນໃໝ່.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.