ຄວາຍຂອງປະຊາຊົນຕາຍ ຫຼາຍກວ່າ 20 ໂຕ ຢູ່ເມືອງປາກງື່ມ ອາດເກີດຈາກພະຍາດເຕົ້າໂຮມເລືອດ

    0
    107

    ຄວາຍຂອງປະຊາຊົນຕາຍຢູ່ບ້ານຫ້ວຍນໍ້າຍຸນ ແລະ ບ້ານໜອງດົງ ເມືອງປາກງື່ມ ນະຄອນຫຼວງວຽງຈັນ ຫຼາຍກວ່າ 20 ໂຕ ໃນທ້າຍອາທິດຜ່ານມານີ້, ສາເຫດອາດເກີດຈາກພະຍາດເຕົ້່າໂຮມເລືອດ ບໍ່ແມ່ນຕາຍຍ້ອນສານເຄມີ.

    ທ່ານ ຄໍາໝູນ ຕຽງທະລາດ ເຈົ້າເມືອງປາກງື່ມ ໃຫ້ຮູ້ໃນວັນທີ 30 ສິງຫານີ້ວ່າ:

    ເຫດການຄວາຍຕາຍຄັ້ງນີ້ ເກີດຂຶ້ນຕັ້ງແຕ່ວັນທີ 27 ສິງຫາ, ເຊິ່ງເບື້ອງຕົ້ນມີຄວາຍຂອງຄອບຄົວ ທ້າວ ເກີດ ຢູ່ບ້ານຫ້ວຍນໍ້າຍຸນ ຕາຍ 1 ໂຕ, ແຕ່ຄອບຄົວຂອງຜູ້ກຽ່ວບໍ່ໄດ້ລາຍງານການຈັດຕັ້ງ, ກົງກັນຂ້າມໄດ້ພາກັນຄົວຄວາຍທີ່ຕາຍແບ່ງປັນກັນໄປປຸງແຕ່ງເປັນອາຫານ.

    ຈາກນັ້ນ, ມື້ຕໍ່ມາ ວັນທີ 28 ສິງຫາ, ຈຶ່ງລາຍງານການຈັດຕັ້ງທີ່ກ່ຽວຂ້ອງ ຍ້ອນວ່າມີຄວາຍອີກຫຼາຍໂຕມີອາການບໍ່ດີເກີດຂຶ້ນ ເຮັດໃຫ້ນັບແຕ່ວັນທີ 27 ຫາ ວັນທີ 30 ສິງຫານີ້, ຄວາຍຂອງຄອບຄົວ ທ້າວ ເກີດ ຕາຍໄປແລ້ວ 21 ໂຕ, ໃນຈໍານວນຄວາຍທີ່ມີທັງໝົດ 25 ໂຕ. ນອກຈາກນີ້, ຍັງມີຄວາຍຂອງຄອບຄົວ ທ້າວ ຕົ່ງ ຢູ່ບ້ານໜອງດົງ ຕາຍອີກ 2 ໂຕ ໃນຈໍານວນຄວາຍທັງໝົດ 13 ໂຕ.

    ຕໍ່ສະພາບການທີ່ເກີດຂຶ້ນ, ອົງການປົກຄອງເມືອງ ໄດ້ແຕ່ງຕັ້ງສັດຕະວະແພດຂອງເມືອງ ລົງສົມທົບກັບພາກສ່ວນທີ່ກ່ຽວຂ້ອງ ລົງກວດກາຊອກຫາສາເຫດທີ່ເກີດຂຶ້ນ ແລະ ແນະນໍາວິທີທໍາລາຍສັດທີ່ຕາຍຕາມເຕັກນິກວິຊາການທີ່ຖືກຕ້ອງ, ເຊິ່ງຕາມການໃຫ້ຂໍ້ມູນເບື້ອງຕົ້ນຂອງເຈົ້າໜ້າທີ່ວິຊາການຂອງເມືອງ ຄາດວ່າຄວາຍອາດຕາຍຍ້ອນພະຍາດເຕົ້າໂຮມເລືອດ ເນື່ອງຈາກມີອາການຄ້າຍຄືກັບພະຍາດດັ່ງກ່າວ. ແນວໃດກໍຕາມ, ປັດຈຸບັນ ໜ່ວຍງານທີ່ກ່ຽວຂ້ອງພວມຮີບຮ້ອນວິໄຈຫາສາເຫດການຕາຍຂອງຄວາຍດັ່ງກ່າວ ເພື່ອໃຫ້ໄດ້ຂໍ້ມູນທີ່ລະອຽດຊັດເຈນທີ່ສຸດ.

    ຄວາຍທີ່ຕາຍໃນຄັ້ງນີ້ ແມ່ນບໍ່ໄດ້ຕາຍຍ້ອນກິນນໍ້າຢາ ຫຼື ເຄມີຈາກໂຮງງານຂອງຕ່າງປະເທດທີ່ມາລົງທຶນຢູ່ພາຍໃນເມືອງປາກງື່ມ ແຕ່ຢ່າງໃດ. ເພາະໄລຍະຜ່ານມາ ມີງົວ-ຄວາຍຂອງຫຼາຍຄອບຄົວກໍໄປກິນຫຍ້າໃນຂົງເຂດດັ່ງກ່າວເຊັ່ນດຽວກັນ ແຕ່ກໍ່ບໍ່ປະກົດການຫຍັງ ແລະ ບໍ່ມີງົວ-ຄວາຍຕາຍເກີດຂຶ້ນ. ນອກຈາກນີ້, ໄລຍະຜ່ານມາຄວາຍທີ່ຕາຍໃນຄັ້ງນີ້ ແມ່ນບໍ່ໄດ້ຮັບການສັກຢາປ້ອງກັນພະຍາດສັດມາກ່ອນ, ທັງນີ້ອາດເກີດຈາກຫຼາຍສາເຫດ ເຊັ່ນ: ຄອບຄົວເຈົ້າຂອງສັດຖືເບົາຕໍ່ການປ້ອງກັນພະຍາດສັດ ແລະ ງົວ-ຄວາຍຈັບບໍ່ໄດ້ ຍ້ອນການລ້ຽງປະປ່ອຍໄປຕາມທໍາມະຊາດ.

    ທ່ານເຈົ້າເມືອງປາກງື່ມ ໄດ້ຮຽກຮ້ອງມາຍັງປະຊາຊົນພາຍໃນເມືອງທີ່ມີສັດລ້ຽງ ໂດຍສະເພາະງົວ-ຄວາຍ ຢ່າຖືເບົາໃນການສັກຢາປ້ອງກັນພະຍາດສັດຂອງຕົນ ແລະ ຊອກຮູ້ນໍາໃຊ້ເຕັກນິກການລ້ຽງແບບໃໝ່ເຂົ້າມາຊ່ວຍ; ພ້ອມນີ້, ທ່ານຍັງຮຽກຮ້ອງມາຍັງປະຊາຊົນໃນເຂດດັ່ງກ່າວ ບໍ່ໃຫ້ເຄື່ອນຍ້າຍສັດໃນກໍລະນີມີສັດເຈັບເປັນ ແລະ ຢ່າຄົວສັດທີ່ຕາຍເພື່ອໄປປຸງແຕ່ງເປັນອາຫານ ເພາະເປັນອັນຕະລາຍຕໍ່ສຸຂະພາບ ແລະ ມີຄວາມສ່ຽງສູງທີ່ຈະເຮັດໃຫ້ ພະຍາດແຜ່ກະຈາຍຫາສັດໂຕອື່ນໆພາຍໃນເມືອງ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.