ເມືອງແອດ ຍັງມີ 14 ບ້ານເປົ້າໝາຍລັກລອບປູກຝິ່ນ ເຈົ້າໜ້າທີ່ເລັ່ງແກ້ໄຂ

    0
    98

    ມາຮອດປັດຈຸບັນ, ເມືອງແອດ ແຂວງຫົວພັນ ຍັງມີບ້ານທີ່ເປັນເປົ້າໝາຍໃນການລັກລອບປູກຝິ່ນ 14 ບ້ານ ໃນຈໍານວນທັງໝົດ 77 ບ້ານ ພາຍໃນເມືອງ, ສ່ວນຈໍານວນຜູ້ທີ່ຕິດຢາເສບຕິດຊະນິດຕ່າງໆໃນທົ່ວເມືອງ ມາຮອດທ້າຍເດືອນທັນວາ ປີຜ່ານມາ ຍັງເຫຼືອ 677 ຄົນ, ເທົ່າກັບ 2,4% ຂອງພົນລະເມືອງທັງໝົດ. ໃນນີ້, ກວມເອົາເກືອບ 80% ແມ່ນຜູ້ທີ່ມີອາຍຸຕໍ່າກວ່າ 45 ປີລົງມາ.

    ທ່ານ ທອງສຸກ ສົມພາວັນ ເຈົ້າເມືອງແອດ ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າ:

    ເພື່ອແກ້ໄຂບັນຫາຢາເສບຕິດ, ອົງການປົກຄອງເມືອງ ໄດ້ແຕ່ງຕັ້ງຄະນະຮັບຜິດຊອບ ເພື່ອຈັດຕັ້ງຜັນຂະຫຍາຍຕາມທຸກຂັ້ນຕອນທີ່ກໍານົດໄວ້ໃນວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ. ໃນນີ້, ບ້ານທີ່ຍັງມີການລັກລອບປູກຝິ່ນ ແມ່ນໄດ້ລົງໄປເຮັດບົດບັນທຶກກັບນາຍບ້ານ ໂດຍມີເຈົ້າ ເມືອງເປັນຜູ້ຮ່ວມເຊັນກັບນາຍບ້ານທີ່ກ່ຽວຂ້ອງ ເຊິ່ງໄດ້ກໍານົດເນື້ອໃນລະອຽດວ່າ: ບໍ່ໃຫ້ທຸກຄອບຄົວພາຍໃນບ້ານລັກລອບປູກຝິ່ນອີກ, ທັງບໍ່ສ້າງເງື່ອນໄຂອໍານວຍຄວາມສະດວກໃຫ້ໄປປູກຝິ່ນຢູ່ດິນບ້ານອື່ນ ຫຼື ອະນຸຍາດໃຫ້ຜູ້ອື່ນມາປູກຝິ່ນໃນດິນພາຍໃນບ້ານຂອງຕົນ, ຖ້າມີການລະເມີດຈະໃສ່ລະບຽບຕາມກົດໝາຍຢ່າງເຂັ້ມງວດ.

    ສ່ວນການແກ້ໄຂຜູ້ຄ້າ-ຂາຍຢາເສບຕິດ, ເຈົ້າໜ້າທີ່ກ່ຽວຂ້ອງ ໄດ້ຕິດຕາມຈັບກຸມກຸ່ມເປົ້າໝາຍຜູ້ລັກລອບຄ້າ-ຂາຍຢາເສບຕິດ ທີ່ໄດ້ກໍານົດໄວ້ຢ່າງຕໍ່ເນື່ອງ, ນັບສະເພາະແຕ່ຕົ້ນປີນີ້ມາຮອດປັດຈຸບັນ ສາມາດຈັບຜູ້ລັກລອບຄ້າ-ຂາຍຢາເສບຕິດໄດ້ແລ້ວບໍ່ຕ່ຳກວ່າ 20 ກໍລະນີ, ແຕ່ທັງໝົດຍັງແມ່ນຜູ້ ຄ້າ-ຂາຍລາຍຍ່ອຍເທົ່ານັ້ນ. ນອກຈາກນີ້, ແມ່ນການຕັດແຫຼ່ງການນໍາເຂົ້າຢາເສບຕິດ ດ້ວຍການສົ່ງເຈົ້າໜ້າທີ່ກ່ຽວຂ້ອງໄປປະຈໍາ ແລະ ກວດກາຢູ່ຈຸດສ່ຽງຕາມຊາຍແດນກັບປະເທດໃກ້ຄຽງຢ່າງເຂັ້ມງວດ.

    ສໍາລັບການແກ້ໄຂຜູ້ຕິດຢາເສບຕິດຊະນິດຕ່າງໆ ແມ່ນແບ່ງເປັນ 3 ຂັ້ນ ຄື: ຜູ້ທີ່ຕິດບໍ່ທັນຮ້າຍແຮງ ແມ່ນມອບໃຫ້ຄອບຄົວ ແລະ ອົງການປົກຄອງບ້ານທີ່ກ່ຽວຂ້ອງ ເປັນຜູ້ສຶກສາອົບຮົມ ແລະ ປິ່ນປົວພາຍໃນເວລາ 3 ເດືອນ, ຖ້າບໍ່ຢຸດເຊົາແມ່ນເອົາຂຶ້ນມາບໍາບັດຢູ່ຂັ້ນເມືອງ, ສ່ວນຜູ້ທີ່ຕິດຫຼາຍຈົນເປັນອາຈິນ ແມ່ນເອົາຂຶ້ນມາຂັ້ນເມືອງແລ້ວສົ່ງຕໍ່ໄປບໍາບັດຢູ່ຂັ້ນແຂວງ.

    ທ່ານເຈົ້າເມືອງແອດ ໃຫ້ຮູ້ຕື່ມອີກວ່າ: ສໍາລັບຄາດໝາຍໃນການແກ້ໄຂບັນຫາຢາເສບຕິດຢູ່ເມືອງແອດ ໃນເດືອນກັນຍາ ເຈົ້າໜ້າທີ່ໄດ້ເຮັດບົດບັນທຶກຮ່ວມມືກັບ 14 ບ້ານ ທີ່ເປັນບ້ານເປົ້າໝາຍລັກລອບປູກຝິ່ນ ແລະ ລົງໂຄສະນາເຜີຍແຜ່ກ່ຽວກັບບັນຫາຢາເສບຕິດໃນທຸກບ້ານ ກໍຄືທຸກອົງການຈັດຕັ້ງທົ່ວເມືອງໃຫ້ສໍາເລັດ.

    ຈາກນັ້ນ, ໃນເດືອນທັນວາ ຕ້ອງລົບລ້າງບ້ານທີ່ຍັງມີຜູ້ຕິດຢາເສບຕິດ ໃຫ້ໄດ້ປະມານ 50% ເພາະປັດຈຸບັນໃນຈໍານວນ 77 ບ້ານທີ່ມີພາຍໃນເມືອງ ມີພຽງ 8 ບ້ານເທົ່ານັ້ນທີ່ປອດຢາເສບຕິດແທ້. ສ່ວນວຽກງານອື່ນໆທີ່ເຫຼືອ ແມ່ນຈະສືບຕໍ່ຈັດຕັ້ງປະຕິບັດຕາມແຕ່ລະໜ້າວຽກທີ່ກໍານົດໄວ້ໃນແຜນຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດໃຫ້ສຳເລັດ ພາຍໃນປີ 2023.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.