ອຸບັດຕິເຫດລົດຕູ້ TOYOTA ເມົາແລ້ວຂັບຂີ່ ເປັນເຫດໃຫ້ຜູ້ອື່ນເສຍຊີວິດ

    0
    122

    ເຈົ້າໜ້າທີ່ພະແນກຕໍາຫຼວດ ປກສ ເມືອງວຽງພູຄາ ແຂວງຫຼວງນໍ້າທາ ໃຫ້ຮູ້ວ່າ: ໃນເວລາ 21:00 ໂມງ ຂອງວັນທີ 27 ສິງຫາ 2022 ຢູ່ເສັ້ນທາງ R3 ຂອບເຂດສາມແຍກທາງໂຄ້ງບ້ານທ້ຽວ ເມືອງວຽງພູຄາ ໄດ້ເກີດອຸບັດຕິເຫດລົດຕູ້ TOYOTA ຕໍາລົດຈັກ ສົ່ງຜົນເຮັດໃຫ້ມີຜູ້ເສຍຊີວິດ 1 ຄົນ, ມີພາຫະນະເປ່ເພເລັກໜ້ອຍ 1 ຄັນ, ໃຊ້ການບໍ່ໄດ້ 1 ຄັນ, ລວມມູນຄ່າເສຍຫາຍ ປະມານ 60 ລ້ານກວ່າກີບ.

    ຜ່ານການລົງຊັນນະສູດສະຖານທີ່ເກີດເຫດ ແລະ ເອົາຄໍາໃຫ້ການຈາກ ທ້າວ ນິກ ອາຍຸ 20 ປີ ເຊິ່ງເປັນຜູ້ຂັບຂີ່ລົດຕູ້ໂຕໂຢຕ້າ ສີປອນເງິນ ທະບຽນ ກກ 2097 ຫຼວງນໍ້າທາ, ຜູ້ກ່ຽວໃຫ້ຮູ້ວ່າ:

    ກ່ອນເກີດເຫດ ຜູ້ກ່ຽວໄດ້ຊຸມແຊວເຫຼົ້າເບຍນຳໝູ່ ຢູ່ເຂດເມືອງວຽງພູຄາ ເມົາພໍສົມຄວນ, ຮອດເວລາປະມານ 21 ໂມງ ໄດ້ຂັບລົດກັບໄປບ້ານ, ແຕ່ພໍມາຮອດຈຸດເກີດເຫດ ເຂດເສັ້ນທາງ 3 ແຍກ ບ້ານໜອງຄໍາ ເມືອງວຽງພູຄາ ເຊິ່ງເປັນທາງໂຄ້ງ, ລົດໄດ້ເສຍຫຼັກຂ້າມເລນກາງທາງໄປຕໍາກັບລົດຈັກທີ່ຂັບຂີ່ສວນທາງມາ ເຮັດໃຫ້ຜູ້ຂັບຂີ່ເສຍຊິວິດຄາທີ່. ຈາກນັ້ນ, ຜູ້ກ່ຽວໄດ້ຂັບຂີ່ລົດໄປຕໍ່ ຈົນຮອດບ້ານນໍ້າຈິ ແລະ ໄດ້ເກີດອຸບັດຕິເຫດລົດຕົກລົງຮ່ອງຂ້າງທາງ ຍ້ອນວ່າໄຟຕາລົດແຕກ; ຕໍ່ມາ, ຈຶ່ງຖືກເຈົ້າໜ້າທີ່ກັກຕົວໄປດໍາເນີນຄະດີ.

    ພັຕ ຄໍາສຸກ ຈິດຕະພອນ ຮອງຫົວໜ້າພະແນກຕໍາຫຼວດ ໃຫ້ຮູ້ວ່າ: ຜູ້ຂັບຂີ່ລົດຈັກທີ່ເສຍຊີວິດ ຊື່ ທ້າວ ຄໍາພູ ອາຍຸ 45 ປີ ຢູ່ບ້ານໜອງຄໍາ ເມືອງວຽງພູຄາ; ພາຍຫຼັງກວດກາຊັນນະສູດສົບແລ້ວ ກໍໄດ້ມອບໃຫ້ຍາດຕິພີ່ນ້ອງນໍາໄປສົ່ງສະການຕາມຮີດຄອງປະເພນີ.

    ສ່ວນ ທ້າວ ນິກ ຜູ້ຖືກຫາ ແມ່ນໄດ້ມອບໃຫ້ພະແນກກ່ຽວຂ້ອງ ດໍາເນີນການແກ້ໄຂຕາມລະບຽບກົດໝາຍ ແລະ ໃຫ້ຄວາມເປັນທໍາແກ່ຄູ່ກໍລະນີທັງສອງຝ່າຍ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.