ຊາຍໄວ 40 ປີ ໃຊ້ຈົກຄ າ ດ ຕ ະ ກ ຳ ເມຍຕົນເອງ 3 ບາດເຮັດໃຫ້ເສຍຊີວິດຄາທີ່ ຍ້ອນເສບຢ າ ບ ້ າ ປະສາດຫຼອນ

    0
    33

    ຊາຍໄວ 40 ປີ ເສບຢາບ້າຫຼາຍ ເຮັດໃຫ້ປະສາດຫຼອນ ກໍ່ເຫດໃຊ້ຈົກຕີຫົວເມຍຕົນເອງ 3 ບາດ ສົ່ງຜົນເຮັດໃຫ້ເສຍຊີວິດຄາທີ່, ເຫດການດັ່ງກ່າວນີ້ເກີດຂຶ້ນໃນເວລາ 11:00 ໂມງ ຂອງວັນທີ 11 ກັນຍາ 2022, ທີ່ບ້ານນາເກືອ ເມືອງຊໍາໃຕ້ ແຂວງຫົວພັນ.

    ເຈົ້າໜ້າທີ່ ປກສ ເມືອງຊໍາໃຕ້ ແຂວງຫົວພັນ ໃຫ້ຮູ້ວ່າ: ພາຍຫຼັງໄດ້ຮັບລາຍງານທາງໂທລະສັບ ຈາກອົງການປົກຄອງບ້ານນາເກືອ ເມືອງຊໍາໃຕ້ ແຂວງຫົວພັນ ວ່າມີເຫດການຄາດຕະກໍາຢູ່ທາງໄປຖຽງນາ ຫ້ວຍສົງ ເຂດບ້ານນາເກືອ. ຈາກນັ້ນ, ເຈົ້າໜ້າທີ່ວິຊາສະເພາະ ຈຶ່ງສົມທົບກັບພາກສ່ວນທີ່ກ່ຽວ ຂ້ອງລົງໄປກວດກາສັນລະສູດສະຖານທີ່ເກີດເຫດດັ່ງກ່າວ ພົບເຫັນຄົນເສຍຊີວິດ 1 ຄົນ ເພດຍິງ ຊື່ ນາງ ມີ້ ອາຍຸ 36 ປີ ປະຊາຊົນ ຢູ່ບ້ານນາເກືອ ນອນເສຍຊີວິດຢູ່ແຄມທາງ, ຜ່ານການກວດກາຊັນນະສູດພົບເຫັນຫົວມີຮ່ອງຮອຍບາດແຜ 2 ຮອຍ ແລະ ຕາເບື້ອງຊ້າຍແຕກຍ້ອນຖືກກະທົບຂອງແຂງ.

    ຜ່ານການສອບຖາມ ຈຶ່ງຮູ້ວ່າ ຜູ້ລົງມືກໍ່ເຫດແມ່ນຜົວຂອງ ນາງ ມີ້ ຊື່ ທ້າວ ໄຊເກີ ອາຍຸ 40 ປີ; ຈາກນັ້ນ, ເຈົ້າໜ້າທີ່ ຈຶ່ງນໍາຈັບຕົວຜູ້ກ່ຽວໄດ້; ຜ່ານການສອບສວນ ທ້າວ ໄຊເກີ ຮັບສະລາພາບວ່າ: ໃນປີ 2000, ໄດ້ສ້າງຄອບຄົວກັບ ນາງ ມີ້. ຮອດປີ 2015, ເລີ່ມເສບຢາບ້າ ເຮັດໃຫ້ຄອບຄົວບໍ່ມີຄວາມສະຫງົບ ຜິດຖຽງກັນມາຕະຫຼອດຈົນເຖິງປັດຈຸບັນ ເຮັດໃຫ້ຜູ້ເປັນເມຍທົນຢູ່ນໍາບໍ່ໄດ້ ຈຶ່ງໄດ້ຍ້າຍໄປຢູ່ນໍາພໍ່ປູ່ແມ່ຍ່າທີ່ຖຽງນາ ຫ່າງກັນປະມານ 600 ແມັດ.

    ມາຮອດວັນທີ 10 ກັນຍາ 2022, ທ້າວ ໄຊເກີ ກໍໄດ້ຍ່າງຈາກຖຽງນາຕົນໄປຫາເມຍ ພໍໄປຮອດກໍໄດ້ຜິດຖຽງກັນ. ມື້ຕໍ່ມາ, ທ້າວ ໄຊເກີ ໄດ້ເສບຢາບ້າ ແລ້ວຍ່າງໄປຫາເມຍ ແລະ ຜິດຖຽງກັນອີກ. ຮອດເວລາ 8:00 ໂມງ ຂອງວັນທີ 11 ກັນຍາ, ຈຶ່ງຍ່າງກັບຖຽງນາ ພໍຍ່າງມາຮອດໄຮ່ເຂົ້າຫ່າງຈາກຖຽງທີ່ເມຍຢູ່ປະມານ 150 ແມັດ. ຜູ້ກ່ຽວກໍໄດ້ນັ່ງພັກຜ່ອນກິນອ້ອຍ; ໃນເວລານັ້ນກໍໄດ້ພົບເຫັນ ນາງ ມີ້ ເປ້ກະຕ່າ ແລະ ມືຖືຈົກຍ່າງກາຍໄປ. ຜູ້ກ່ຽວ ຈຶ່ງຫາເລື່ອງຜິດຖຽງກັນອີກຢ່າງຮຸນແຮງ ເຮັດໃຫ້ ທ້າວ ໄຊເກີ ເກີດມີອາການໂມໂຫ ແລ້ວຍ່າງເຂົ້າໄປຫາ ນາງ ມີ້ ຍາດເອົາຈົກທີ່ ນາງ ມີ້ ຖືມາ ຕີໃສ່ຫົວ 1 ບາດ ເຮັດໃຫ້ ນາງ ມີ້ ລົ້ມລົງກັບທີ່ ແລ້ວຜູ້ກ່ຽວກໍເອົາຈົກຕີຊໍ້າໃສ່ຫົວອີກ 1 ບາດ ແລະ ຕີເຂົ້າທີ່ຕາເບື້ອງຊ້າຍອີກ 1 ບາດ ສົ່ງຜົນເຮັດໃຫ້ເສຍຊີວິດຄາທີ່.

    ຕາມການສັນນິຖານຂອງເຈົ້າໜ້າທີ່, ແຮງຈູງໃຈພາໃຫ້ ທ້າວ ໄຊເກີ ກໍ່ເຫດຄາດຕະກໍາເມຍຕົນເອງໃນຄັ້ງນີ້ ແມ່ນເກີດຈາກຜູ້ກ່ຽວເມົາຢາບ້າທີ່ເສບເຂົ້າໄປ ແລະ ໂມໂຫທີ່ເມຍບໍ່ຍອມກັບໄປຢູ່ນໍາຜູ້ກ່ຽວ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.