ຄະນະນຳກົມໃຫຍ່ການເມືອງ ປກສ ຢ້ຽມຢາມ ແລະ ໃຫ້ກຳລັງໃຈຕຳຫຼວດ ໄດ້ຮັບບາດເຈັບ ຂະນະປະຕິບັດໜ້າທີ່

    0
    43

    ໃນວັນທີ 21 ກັນຍາ 2022, ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ກະຊວງ ປກສ ແລະ ພົຈວ ຟານ ແທງ ຕວັນ ຫົວໜ້າອົງການຜູ້ຕາງໜ້າກະຊວງປ້ອງກັນຄວາມສະຫງົບຫວຽດນາມ ປະຈໍາລາວ ໄດ້ລົງຢ້ຽມຢາມ ແລະ ໃຫ້ກໍາລັງໃຈ ຮຕ ຄໍາແສນ ກາບຸນໄຊ ທີ່ໄດ້ຮັບບາດເຈັບໃນຂະນະທີ່ປະຕິບັດໜ້າທີ່ແກ້ໄຂຢາເສບຕິດຢູ່ບ້ານຫ້ວຍເຈາະ ເມືອງວຽງຄໍາ ແຂວງຫຼວງພະບາງ, ເຊິ່ງຍັງນອນປິ່ນປົວຢູ່ໂຮງໝໍສູນກາງ 103 ກອງທັບປະຊາຊົນລາວ.

    ໃນການລົງຢ້ຽມຢາມຄັ້ງນີ້, ຄະນະນໍາທັງສອງພາກສ່ວນຍັງໄດ້ມອບເຄື່ອງ ແລະ ເງິນຊຸກຍູ້ຈໍານວນໜຶ່ງໃຫ້ຄອບຄົວນາຍຕໍາຫຼວດທີ່ໄດ້ຮັບບາດເຈັບ ເພື່ອເປັນການຊຸກຍູ້ ແລະ ໃຫ້ກໍາລັງໃຈແກ່ຄອບຄົວ ແລະ ນາຍຕໍາຫຼວດທີ່ໄດ້ຮັບບາດເຈັບມີກໍາລັງໃຈສູ້ຕໍ່ໄປ; ທັງຍັງໄດ້ສະແດງໃຫ້ເຫັນເຖິງຄວາມເປັນຫວ່ງເປັນໄຍ ແລະ ເອົາໃຈໃສ່ຂອງກະຊວງປ້ອງກັນຄວາມສະຫງົບ ໂດຍສະເພາະກົມໃຫຍ່ການເມືອງ ປກສ ທີ່ໄດ້ເອົາໃຈໃສ່ຕິດຕາມອາການຂອງນາຍຕໍາຫຼວດທີ່ໄດ້ຮັບບາດເຈັບ ແລະ ຊີວິດການເປັນຢູ່ຂອງຄອບຄົວ ໂດຍຈະໃຫ້ຄວາມຊ່ວຍເຫຼືອຢ່າງເຕັມທີ່.

    ໂອກາດດຽວກັນ, ພົຕ ວັນທອງ ກອງມະນີ ຍັງໄດ້ຮັບຟັງການລາຍງານກ່ຽວກັບອາການຂອງນາຍຕໍາຫຼວດທີ່ໄດ້ຮັບບາດເຈັບຈາກ ພັທ ດຣ ປານ ພິລາວົງ ຮອງອໍານວຍການໂຮງໝໍສູນກາງ 103 ກອງທັບປະຊາຊົນລາວ, ເຊິ່ງທ່ານໄດ້ໃຫ້ຮູ້ວ່າ: ປັດຈຸບັນອາການຂອງນາຍຕໍາຫຼວດທີ່ໄດ້ຮັບບາດເຈັບແມ່ນດີຂຶ້ນຕາມລະດັບ, ສາມາດຕອບສະໜອງໄດ້ໃນລະດັບໜຶ່ງ ແລະ ຍັງສືບຕໍ່ຕິດຕາມອາການຕື່ມອີກ ເປັນແຕ່ລະໄລຍະ. ຈາກນັ້ນ, ທ່ານຮອງລັດ ຖະມົນຕີຍັງໄດ້ສະແດງຄວາມຂອບໃຈຕໍ່ການເອົາໃຈໃສ່ຂອງຄະນະນໍາກະຊວງປ້ອງກັນປະເທດ ຕະຫຼອດຮອດແພດ-ໝໍ ທີ່ໄດ້ສຸມຈິດໃຈທາງດ້ານວິຊາສະເພາະຊ່ວຍຊີວິດ ແລະ ປິ່ນປົວນາຍຕໍາຫຼວດຂອງກໍາລັງປ້ອງກັນຄວາມສະຫງົບຄັ້ງນີ້, ເຊິ່ງມັນໄດ້ສະແດງໃຫ້ເຫັນຄວາມສາມັກຄີ ແລະ ຊ່ວຍເຫຼືອເຊິ່ງກັນແລະກັນຂອງສອງກໍາລັງປະກອບອາວຸດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.