ຮັບຮອງເອົາ 5 ບ້ານ ເປັນບ້ານປ້ອງກັນຄວາມສະຫງົບດີ

    0
    42

    ພິທີປະກາດຮັບຮອງເອົາ 5 ບ້ານ ເປັນບ້ານປ້ອງກັນຄວາມສະຫງົບດີ ຢູ່ເມືອງປາກລາຍ ແຂວງໄຊຍະບູລີ ໄດ້ຈັດຂຶ້ນທີ່ບ້ານມ່ວງເໜືອ ເມືອງປາກລາຍແຂວງໄຊຍະບູລີ, ເຂົ້າຮ່ວມໂດຍ ທ່ານ ກອງສີ ວົງສີ ເຈົ້າເມືອງປາກລາຍ ແຂວງໄຊຍະບູລີ, ພັທ ສຸລິວົງ ສີລິມະໂນທຳ ຫົວໜ້າກອງບັນຊາການ ປກສ ເມືອງປາກລາຍ, ຄະນະພັກ-ຄະນະບັນຊາ, ຫົວໜ້າພະແນກ, ຫົວໜ້າ ປກສ ບໍລິການປະຊາຊົນ, ເລຂາພັກບ້ານ, ນາຍບ້ານ, ຫົວໜ້າ ປກສ ບ້ານ 5 ບ້ານ ເຂົ້າຮ່ວມ.

    ພັທ ບຸນທອນ ປັນຍາສິດ ຮອງຫົວໜ້າກອງບັນຊາການ ປກສ ເມືອງປາກລາຍ ໄດ້ຜ່ານບົດສະຫຼຸບການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ການດຳເນີນງານຂອງຄະນະພັກກອງບັນຊາການ ປກສ ເມືອງປາກລາຍ, ການຈັດຕັ້ງປະຕິບັດ 4 ແຜນງານ 41 ໂຄງການຂອງກະຊວງປ້ອງກັນຄວາມສະຫງົບວາງອອກ ແລະ ການສ້າງບ້ານປອດຢາເສບຕິດ ໃນທົ່ວເມືອງປາກລາຍ, ການຈັດຕັ້ງປະຕິບັດໂຄງການສ້າງຄອບຄົວ-ບ້ານປ້ອງກັນຄວາມສະຫງົບດີ ແລະ ການສ້າງບ້ານປອດຢາເສບຕິດ, ໂດຍອີງໃສ່ຂໍ້ຕົກລົງຂອງ ລັດຖະມົນຕີ ກະຊວງປ້ອງກັນຄວາມສະຫງົບ ເລກທີ 818/ປກສ, ເລກທີ 702/ປກສ, ລົງວັນທີ 22 ເມສາ 2022 ວ່າດ້ວຍ ການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ.

    ມາແຕ່ປີ 2014 ເຖິງປັດຈຸບັນ, ສາມາດສ້າງບ້ານເຮັດວຽກປ້ອງກັນຄວາມສະຫງົບດີ ໄດ້ຈຳນວນ 60 ບ້ານ, ຍັງຄ້າງ 9 ບ້ານ, ຮັບຮອງເປັນບ້ານປອດຢາເສບຕິດ ໄດ້ຈໍານວນ 11 ບ້ານ ເທົ່າກັບ 15,94%, ຍັງບໍ່ທັນໄດ້ 58 ບ້ານ ເທົ່າກັບ 84,05 %. ຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດ, ຄຳເຫັນຍົກໃຫ້ເຫັນດ້ານດີ, ດ້ານອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອເປັນບ່ອນອີງໃນຕໍ່ໜ້າ.

    ໃນພິທີໄດ້ຜ່ານຂໍ້ຕົກລົງຂອງ ທ່ານເຈົ້າແຂວງໄຊຍະບູລີ ເລກທີ 666/ຈຂ.ຊຍ ວ່າດ້ວຍ ການຮັບຮອງເອົາ 5 ບ້ານ ເປັນບ້ານເຮັດວຽກງານປ້ອງກັນ ຄວາມສະຫງົບດີ ຄື: ບ້ານມ່ວງເໜືອ, ບ້ານດອນຫຼຶງ, ບ້ານທ່ານາ, ບ້ານຫາດດ້າຍ ແລະ ບ້ານປາກແລງ, ໃຫ້ກຽດມອບໃບຮັບຮອງໃນຄັ້ງນີ້ໂດຍ ທ່ານ ກອງສີ ວົງສີ ເຈົ້າເມືອງປາກລາຍ.

    ໂອກາດນີ້, ທ່ານຫົວໜ້າ ປກສ ເມືອງປາກລາຍ ໄດ້ສະແດງຄວາມຍ້ອງຍໍຊົມເຊີຍມາຍັງອຳນາດການປົກຄອງ ແລະ ພໍ່ແມ່ປະຊາຊົນທັງ 5 ບ້ານ ທີ່ມີສ່ວນຮ່ວມສ້າງບ້ານ ໃຫ້ເປັນບ້ານແບບຢ່າງເຮັດວຽກງານປ້ອງກັນຄວາມສະຫງົບດີ, ພ້ອມທັງຮຽກຮ້ອງໃຫ້ອຳນາດການປົກຄອງທຸກບ້ານເພີ່ມທະວີ ຄວາມຮັບຜິດຊອບຕໍ່ໜ້າທີ່ການເມືອງ ໃນໄລຍະໃໝ່, ເອົາໃຈໃສ່ປະຕິບັດແນວທາງວຽກງານປ້ອງກັນຊາດ-ປ້ອງກັນຄວາມສະຫງົບ, ນຳເອົາຄຳສັ່ງ, ລະບຽບກົດໝາຍ ແລະ ນິຕິກຳຕ່າງໆຂອງພັກ-ລັດໄປຈັດຕັ້ງປະຕິບັດ ແລະ ເຊື່ອມຊຶມໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈ, ສຸມໃສ່ຊີ້ນຳ-ນຳພາການຈັດຕັ້ງ-ອົງການປົກຄອງບ້ານ, ສະມາຊິກພັກບັນດາຂະແໜງການຕ່າງໆຂອງບ້ານໃຫ້ມີຄວາມເຂັ້ມແຂງ, ພ້ອມກັນປົກປັກຮັກສາ ແລະ ພັດທະນາບ້ານຂອງຕົນໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍ. ຈາກນັ້ນ, ກໍໄດ້ເປີດປ້າຍບ້ານປ້ອງກັນຄວາມສະຫງົບດີ ເປັນບ້ານຕົວແບບ ຢູ່ເມືອງປາກລາຍ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.