ຝຶກຊ້ອມສາທິດວຽກງານຮັກສາຄວາມປອດໄຟ ຢູ່ເສັ້ນທາງລົດໄຟ ລາວ-ຈີນ

    0
    41

    ພິທີຝຶກຊ້ອມສາທິດວຽກງານຮັກສາຄວາມປອດໄພ ຢູ່ເສັ້ນທາງລົດໄຟ ລາວ-ຈີນ ຈັດຂຶ້ນໃນວັນທີ 27 ກັນຍາ 2022 ທີ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ, ໂດຍມີ ທ່ານ ຕູ້ ຈື້ກ່າງ ຜູ້ອໍານວຍການຝ່າຍປະຕິບັດ ບໍລິສັດລົດໄຟ ລາວ-ຈີນ ຈໍາກັດ, ມີຄະນະຮັບຜິດຊອບ, ບັນດາກໍາລັງວິຊາສະເພາະພາກສ່ວນຕ່າງໆ ທີ່ຮັບຜິດຊອບຮັກສາຄວາມສະຫງົບ ຢູ່ເສັ້ນທາງລົດໄຟ ລາວ-ຈີນ ແລະ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

    ພັທ ລີຕູ້ ມີໄຊຕູ້ ຜູ້ອໍານວຍການລັດວິສາຫະກິດລາວບໍລິການຄວາມປອດໄພ-ລະຫວ່າງປະເທດ ກະຊວງ ປກສ ກ່າວວ່າ:

    ທາງລັດວິສາຫະກິດ ໄດ້ຮັບບໍລິການຮັກສາຄວາມປອດໄພຢູ່ເສັ້ນທາງລົດໄຟ ລາວ-ຈີນ ນັບຕັ້ງແຕ່ເດືອນມີນາ ປີ 2022 ເປັນຕົ້ນມາ, ໂດຍເຫັນໄດ້ຄວາມສໍາຄັນຂອງເສັ້ນທາງລົດໄຟ ລາວ-ຈີນ ແລະ ເພື່ອຕ້ານປະກົດການຫຍໍ້ທໍ້, ເຮັດໃຫ້ເສັ້ນທາງລົດໄຟ ລາວ-ຈີນ ມີຄວາມປອດໄພ 100%.

    ຕໍ່ກັບເສັ້ນທາງລົດໄຟ ລາວ-ຈີນ ນີ້ແມ່ນມີຄວາມໝາຍຄວາມສໍາຄັນ, ເຊິ່ງເສັ້ນທາງລົດໄຟດັ່ງກ່າວ ໄດ້ເປັນເສັ້ນທາງຍຸດທະສາດລະຫວ່າງສອງພັກສອງລັດ ລາວ-ຈີນ ແລະ ເປັນວຽກງານໜຶ່ງທີ່ຈະຕ້ອງໄດ້ຮັບຜິດຊອບຮັກສາຄວາມປອດໄພໃຫ້ມີຄວາມສະຫງົບ. ສະນັ້ນ, ຈຶ່ງໄດ້ມີພິທີຮ່ວມກັນຝຶກຊ້ອມສາທິດວຽກງານຮັກສາຄວາມປອດໄພ ເພື່ອເປັນບົດຮຽນໃຫ້ແກ່ການປະຕິບັດວຽກງານວິຊາສະເພາະຕົວຈິງ.

    ການເຂົ້າຮ່ວມຝຶກຊ້ອມຄັ້ງນີ້ ປະກອບມີ: ບໍລິສັດທາງລົດໄຟ ລາວ-ຈີນ, ລັດວິສາຫະກິດລາວບໍລິການຄວາມປອດໄພ-ລະຫວ່າງປະເທດ, ສູນຄວບຄຸມບໍາລຸງຮັກສາທາງລົດໄຟ ລາວ-ຈີນ, ປກສ ເມືອງນາຊາຍທອງ, ກົມຕໍາຫຼວດທາງລົດໄຟ, ກົມສູ້ຮົບ ກະຊວງປ້ອງກັນປະເທດ, ໜ່ວຍກູ້ໄພ 1623, ກໍາລັງ ປກຊ-ປກສ ບ້ານ ແລະ ປະຊາຊົນ ບ້ານຫ້ວຍນ້ຳເຢັນ.

    ການຝຶກຊ້ອມຄັ້ງນີ້ ກໍໄດ້ມີການສະແດງສາທິດເຫດການຕົວຈິງ ເມື່ອມີກຸ່ມຄົນບໍ່ດີ (ໂຈນ) ເຂົ້າໄປລັກຫັນເອົານ໋ອດຈັບທາງລົດໄຟ, ເມື່ອກໍາລັງຮັກສາຄວາມປອດໄພ ແລະ ເຈົ້າໜ້າທີ່ ປກຊ-ປກສ ອອກກວດກາລາດຕະເວນພົບເຫັນ ກໍໄດ້ມີການໂທປະສານຫາສູນປະຕິບັດການ ແລ້ວໂທປະສານຫາເຈົ້າໜ້າທີ່ພາກສ່ວນຕ່າງໆ.

    ຫຼັງຈາກນັ້ນ, ກໍເຂົ້າຈັບກຸມໂຈນແລ້ວຖ່າຍຮູບໄວ້ເປັນຫຼັກຖານ ເພື່ອສືບຕໍ່ດໍາເນີນຄະດີ, ໃນຂະນະທີ່ເຂົ້າຈັບກຸມໂຈນ ຫາກໄດ້ຮັບບາດເຈັບກໍຈະມີໜ່ວຍກູ້ໄພປະຖົມພະຍາບານຂັ້ນເບື້ອງຕົ້ນ ແລ້ວນໍາສົ່ງໂຮງໝໍ; ຈາກນັ້ນ, ສູນຄວບຄຸມບໍາລຸງຮັກສາທາງລົດໄຟ ລາວ-ຈີນ ກໍໄດ້ຮີບຮ້ອນມາສ້ອມແປງນ໋ອດທີ່ຖືກຫັນອອກໄປໃຫ້ກັບມາໃຊ້ໄດ້ຢ່າງເປັນປົກກະຕິໂດຍໄວ ເພື່ອໃຫ້ລົດໄຟແລ່ນມາໄດ້ຢ່າງເປັນປົກກະຕິ ແລະ ປອດໄພ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.