ເຈົ້າໜ້າທີ່ ສຶກສາອົບຮົມແກ້ງຂັບຂີ່ລົດກວນເມືອງ ຈຳນວນ 14 ຄົນ

    0
    44

    ພະແນກຕຳຫຼວດຈະລາຈອນ ປກສ ແຂວງຫຼວງນ້ຳທາ ໃຫ້ຮູ້ວ່າ: ໃນວັນທີ 31 ສິງຫາ 2022, ໄດ້ເຊີນເອົາພໍ່-ແມ່ຜູ້ປົກຄອງ ແລະ ກຸ່ມເດັກໄວລຸ້ນທີ່ດັດແປງສະພາບເຕັກນິກລົດ, ຂັບຂີ່ລົດກວນເມືອງມາສຶກສາອົບຮົມກ່າວເຕືອນ.

    ໃນການສຶກສາອົບຮົມຄັ້ງນີ້, ໄດ້ອະທິບາຍກ່ຽວກັບກົດລະບຽບ, ຂໍ້ຫ້າມຕ່າງໆຂອງການສັນຈອນຕາມທ້ອງຖະໜົນຕໍ່ກຸ່ມໄວລຸ້ນທີ່ຖືກສຶກສາອົບຮົມຈຳນວນ 14 ຄົນ ອາຍຸລະຫວ່າງ 13-18 ປີ ຈໍານວນ 11 ຄົນ ແລະ ອາຍຸ 19-30 ປີ ຈໍານວນ 3 ຄົນ ໃຫ້ໄດ້ຮັບຮູ້ ແລະ ເຂົ້າໃຈຕໍ່ກັບລະບຽບການ; ເຊິ່ງພາຫະນະທີ່ຖືກດັດແປງສະພາບເຕັກນິກ ແລະ ໃຊ້ຂັບຂີ່ລົດກວນເມືອງມີຈຳນວນ 14 ຄັນ. ສ່ວນຫຼາຍແມ່ນລົດທີ່ຖືກດັດແປງ, ປ່ຽນຖ່າຍລະບົບທໍ່ຄວັນ (ເຮັດໃຫ້ເກີດມີສຽງດັງເກີນຂອບເຂດ) ຈຳນວນ 7 ຄັນ, ໄຟຕາສີ, ໃສ່ຢາງນ້ອຍ, ລະບົບຮ່າງລົດ ແລະອື່ນໆ ທີ່ບໍ່ຖືກຕ້ອງ ແລະ ບໍ່ຮັບປະກັນ, ເຊິ່ງມີຄວາມສ່ຽງຕໍ່ການເກີດອຸບັດຕິເຫດ. ພ້ອມດຽວກັນນັ້ນ, ໄດ້ສ້າງບົດບັນທຶກເຊັນຢັ້ງຢືນຕໍ່ເຈົ້າໜ້າທີ່ ແລະ ນຳເອົາອາໄຫຼ່ທີ່ຖືກຕ້ອງຕາມສະພາບເຕັກ ນິກຂອງໂຮງງານມາປ່ຽນໃສ່ລົດ ແລ້ວຈຶ່ງອະນຸຍາດໃຫ້ນຳລົດຈຳນວນດັ່ງກ່າວໄປຊົມໃຊ້.

    ໃນໂອກາດນີ້, ຮອ ພູມປັນຍາ ຊົງຕົງຕົ້ວ ຫົວໜ້າກອງຕຳຫຼວດທາງຫຼວງ ຍັງໄດ້ຮຽກຮ້ອງໃຫ້ຜູ້ທີ່ຖືກສຶກສາອົບຮົມໃນຄັ້ງນີ້ ຈົ່ງປ່ຽນແປ່ງພຶດຕິກຳທີ່ບໍ່ເໜາະສົມໃນໄລຍະຜ່ານມາ, ໃຫ້ມີສະຕິ ແລະ ນັບຖືກົດລະບຽບກົດຈະລາຈອນຢ່າງເຂັ້ມງວດ. ພ້ອມທັັງຮຽກຮ້ອງໃຫ້ພໍ່-ແມ່ຜູ້ປົກຄອງ ຈົ່ງຊ່ວຍເຈົ້າ ໜ້າທີ່ສຶກສາອົບຮົມ, ລູກຫຼານຂອງຕົນ ບໍ່ໃຫ້ສືບຕໍ່ເຄື່ອນໄຫວຂັບຂີ່ລົດກວນເມືອງຕື່ມອີກ. ຖ້າພົບເຫັນໃນຄັ້ງໜ້າແມ່ນຈະໄດ້ດຳເນີນຕາມລະບຽບກົດໝາຍຢ່າງເຂັ້ມງວດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.