ບຸນຊ່ວງເຮືອ ທ່າວັດຈັນ ປີນີ້ ວາງກຳລັງຈະລາຈອນ 270 ກວ່າສະຫາຍ ອຳນວຍຄວາມສະດວກເພື່ອແກ້ໄຂບັນຫາລົດຕິດ

    0
    44

    ບຸນອອກພັນສາປະວໍລະນາ ແລະ ບຸນຊ່ວງເຮືອ ທ່າວັດຈັນ ຢູ່ນະຄອນຫຼວງວຽງຈັນປີນີ້ ຈະຈັດຂຶ້ນໃນລະຫວ່າງວັນທີ 8-11 ຕຸລາ 2022 ແລະ ຄາດວ່າຈະມີມວນຊົນຫຼັ່ງໄຫຼກັນເຂົ້າມາທ່ຽວຊົມງານດັ່ງກ່າວ ເປັນຈໍານວນຫຼາຍ ແລະ ອາດຈະພາໃຫ້ເກີດບັນຫາລົດຕິດອັ່ງອໍ ຢູ່ຕາມເສັ້ນທາງເຂົ້າອອກຕ່າງໆ; ສະນັ້ນ, ເພື່ອຮັບມືກັບບັນຫາທີ່ຈະເກີດຂຶ້ນ ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ຈຶ່ງວາງກໍາລັງລົງປ້ອງກັນ, ຈັດລະບຽບ ແລະ ລະບາຍການສັນຈອນ 270 ກວ່າສະຫາຍ.

    ພັທ ວິລະພົງ ສະເນ່ຫາ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ກ່າວໃນກອງປະຊຸມຜ່ານແຜນປ້ອງກັນ ງານບຸນອອກພັນສາປະວໍລະນາ ແລະ ບຸນຊ່ວງເຮືອ ທ່າວັດຈັນ ໃນວັນທີ 5 ຕຸລາ 2022 ວ່າ:

    ເພື່ອເຮັດໃຫ້ສະພາບການສັນຈອນ ໃນຊ່ວງງານບຸນດັ່ງກ່າວ ມີຄວາມສະດວກ-ສະບາຍ, ຮັບປະກັນບໍ່ໃຫ້ມີລົດຕິດອັ່ງອໍຫຼາຍຊົ່ວໂມງ, ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ຈະສຸມກໍາລັງລົງປະຕິບັດໜ້າທີ່ ເລີ່ມແຕ່ວັນທີ 8-11 ຕຸລານີ້ ຢູ່ຕາມຈຸດສັບສົນ 3 ແຍກ, 4 ແຍກ, ຕາມສາຍທາງຫຼັກທີ່ມວນຊົນຈະໃຊ້ເຂົ້າມາທ່ຽວຊົມພາຍໃນງານ ເພື່ອອໍານວຍຄວາມສະດວກຮອບດ້ານໃຫ້ແກ່ຜູ້ໃຊ້ລົດ-ໃຊ້ຖະໜົນ; ກຳລັງຕໍາຫຼວດຈະລາຈອນ ຈະລົງປ້ອງກັນ ແລະ ປະຈໍາຢູ່ທັງໝົດ 53 ຈຸດ. ໃນນີ້, ວົງໃນ 31 ຈຸດ ແລະ ວົງນອກ 22 ຈຸດ ລວມຈໍານວນພົນທັງໝົດ 271 ສະຫາຍ.

    ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການ ຫົວໜ້າຫ້ອງຕໍາຫຼວດ ປກສ ນະຄອນຫຼວງວຽງຈັນ ເນັ້ນໃຫ້ກໍາລັງຕໍາຫຼວດຈະລາຈອນ ນະຄອນຫຼວງວຽງຈັນ ທີ່ຈະລົງປະຕິບັດໜ້າທີ່ ຕ້ອງເອົາໃຈໃສ່ຢ່າງເຂັ້ມງວດໃນການເຮັດໜ້າທີ່ປ້ອງກັນ, ທີ່ສໍາຄັນຕ້ອງເອົາໃຈໃສ່ຢ່າງຈິງຈັງ ໃນການລະບາຍການສັນຈອນຢູ່ຕາມເສັ້ນທາງຫຼັກ ຫຼື ເສັ້ນທາງຕ່າງໆທີ່ມວນຊົນ ຈະນໍາໃຊ້ໃນການເຂົ້າ-ອອກງານບຸນ ຕິດພັນກັບ ການຈັດສັນລະບຽບຕາມເສັ້ນທາງ ແລະ ຈັດສັນສະຖານທີ່ຈອດລົດໃຫ້ແທດເໝາະກັບສະພາບຄວາມເປັນຈິງ.

    ນອກຈາກນີ້, ຕ້ອງເອົາໃຈໃສ່ໃນການເຮັດໜ້າທີ່ໂຄສະນາເຜີຍແຜ່ລະບຽບການສັນຈອນ ໃຫ້ບັນດາມວນຊົນທີ່ນໍາໃຊ້ລົດ-ໃຊ້ຖະໜົນມາທ່ຽວງານດັ່ງກ່າວ ຮັບຮູ້ ແລະ ເຂົ້າໃຈເຖິງໄພອັນຕະລາຍໃນການເກີດອຸບັດຕິເຫດ, ແນໃສ່ເຮັດໃຫ້ບັນຫາການເກີດອຸບັດຕິເຫດ ໃນໄລຍະງານບຸນອອກພັນສາປະວໍລະນາ ແລະ ບຸນຊ່ວງເຮືອ ທ່າວັດຈັນ ຫຼຸດໜ້ອຍຖອຍລົງ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.