ໃຫ້ລະວັງກັນແດ່ເດີ້ ທ່ຽວບຸນຊ່ວງເຮືອຢ່າງມີສະຕິ ເພື່ອປ້ອງກັນການຖືກແຫກກະເປົາ

    0
    90

    ບຸນອອກພັນສາ ແລະ ຊ່ວງເຮືອທ່າວັດຈັນ ນະຄອນຫຼວງວຽງຈັນ ໃນໄລຍະປີຜ່ານມາ ໄດ້ເກີດປະກົດການຫຍໍ້ທໍ້ຫຼາຍຢ່າງ ເຊັ່ນ: ແຫກກະເປົ໋າ, ລ່ວງກະເປົາ, ດຶງກະເປົາ ແລະ ຊິງຊັບ; ແຕ່ໃນປີ 2022 ນີ້, ຜູ້ທີ່ມາທ່ຽວບຸນຕ້ອງມີສະຕິລະວັງຕົວ ເພື່ອປ້ອງກັນ ແລະ ຮັກສາຊັບສິນຂອງຕົນເອງ.

    ບຸນອອກພັນສາ ແລະ ຊ່ວງເຮືອປະຈໍາປີ 2022, ກອງບັນຊາການ ປກສ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງ ໄດ້ວາງກໍາລັງປ້ອງກັນທາງວົງໃນ ແລະ ວົງນອກ ຈໍານວນຫຼາຍຮ້ອຍສະຫາຍ ເພື່ອອໍານວຍຄວາມສະດວກໃຫ້ແກ່ຜູ້ທີ່ມາທ່ຽວຊົມໃນງານບຸນ. ຢ່າງໃດກໍຕາມ, ການປ້ອງກັນເວນຍາມ ອາດຈະບໍ່ທົ່ວເຖິງ ຍ້ອນພື້ນທີ່ກວ້າງ

    ແລະ ຜູ້ຄົນເປັນຈໍານວນຫຼວງຫຼາຍ; ບັນຫາດັ່ງກ່າວອາດຈະເຮັດໃຫ້ກຸ່ມຄົນບໍ່ດີສວຍໂອກາດລົງມືແຫກກະເປົ່າ, ລ່ວງກະເປົາ ແລະ ຊິງຊັບ ເກີດຂຶ້ນ ກໍເປັນໄດ້; ສະນັ້ນ, ຜູ້ທີ່ມາທ່ຽວໃນງານບຸນຕ້ອງມີສະຕິລະວັງຕົວໃນການຮັກສາຊັບສິນ ເປັນຕົ້ນບໍ່ຄວນໃສ່ສາຍຄໍ, ໃນເວລາພາຍກະເປົາ ກໍຕ້ອງເອົາໄວ້ທາງໜ້າ ແລະ ເອົາມືກອດໄວ້ຕະຫຼອດ, ບໍ່ຄວນໄປສະຖານທີ່ປ່ຽວ ແລະ ສະຖານທີ່ຄົນແອອັດອື່ນໆ.

    ເພື່ອຮັບປະກັນໃຫ້ງານບຸນມີຄວາມສະຫງົບບັນດາມວນຊົນ ແລະ ຜູ້ປະກອບການຄວນປະຕິບັດຕາມຂໍ້ຫ້າມທີ່ວາງອອກຢ່າງເຂັ້ມງວດ ດັ່ງນີ້;ຫ້າມຊື້-ຂາຍສິນຄ້າ, ຊັດໝາກປູມເປົ້າ ແລະ ອຸປະກອນທີ່ກໍ່ໃຫ້ເກີດສຽງແຕກທຸກປະເພດ, ຫ້າມບໍ່ໃຫ້ຈຸດໝາກກະໂພກ, ບັ້ງໄຟດອກ, ຈຸດໂຄມໄຟລອຍຂຶ້ນຟ້າທຸກຊະນິດ-

    ທຸກລະດັບ, ບໍ່ໃຫ້ນຳໃຊ້ທາດລະເບີດ, ທາດແຕກ, ທາດເບື່ອ-ເຄມີ, ວັດຖຸກຳມັນຕະພາບລັງສີ ແລະ ວັດຖຸອອກລິດຕໍ່ສຸຂະ ພາບທີ່ສ້າງຜົນກະທົບຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ.ຫ້າມເອົາມີດ, ພ້າ, ດາບ-ງາວ ແລະ ວັດຖຸທີ່ຕ້ອງຫ້າມເຂົ້າໄປວາງຂາຍໃນງານບຸນຢ່າງເດັດຂາດ ແລະ ຫ້າມເອົາອາວຸດທຸກປະເພດເຂົ້າໄປໃນງານບຸນ (ຍົກເວັ້ນເຈົ້າໜ້າທີ່ໄປປະຕິບັດໜ້າທີ່ວຽກງານຕາມການມອບໝາຍ).

    ຫ້າມລວມຕົວກັນເປັນກຸ່ມດື່ມເຫຼົ້າ-ມຶນເມົາ, ທ່ຽວຫຼິ້ນແບບລາມົກອະນາຈານ, ຫຼິ້ນການພະນັນທຸກປະເພດ ແລະ ຜິດຖຽງກໍ່ອາລະວາດຕີກັນ, ສ້າງຄວາມບໍ່ສະຫງົບ ຢ່າງເດັດຂາດ.

    ຫ້າມເສບຄົບງັນຕາມລົດ ຫຼື ເຮືອນຊານທີ່ສ້າງຄວາມເນືອງນັນ, ເປີດສຽງດັງເກີນຂອບເຂດ, ຫ້າມຂີ່ລົດເປັນພື່ງເປັນແພ, ແຂ່ງລົດ, ແລ່ນລົດໄວເກີນຂອບເຂດ, ເວລາຂັບຂີ່ລົດປະເພດຕ່າງໆສັນຈອນຕາມທ້ອງຖະໜົນ ຜູ້ຂັບຂີ່ຕ້ອງປະຕິບັດຕາມກົດລະບຽບຈະລາຈອນວາງອອກຢ່າງເຂັ້ມງວດ ເຊັ່ນ: ດື່ມສິ່ງມືນເມົາແລ້ວບໍ່ຂັບລົດ ຫຼື ຂັບລົດບໍ່ດື່ມສິ່ງມຶນເມົາຢ່າງເດັດຂາດ.

    ຫ້າມບໍ່ໃຫ້ຜູ້ໂດຍສານນັ່ງຫົວລົດເວລາຂັບຂີ່ໄປຕາມທ້ອງຖະໜົນ, ຫ້າມລົດບັນທຸກຂົນສົ່ງສິນຄ້າໜັກ, ລົດໂດຍສານບັນທຸກເກີນຂອບເຂດ, ຜູ້ຂັບຂີ່ພາຫະນະທຸກປະເພດຕ້ອງປະຕິບັດຕາມປ້າຍສັນຍານຈະລາຈອນ ແລະ ກົດລະບຽບການສັນຈອນຢ່າງເຄັ່ງຄັດ.

    ບັນດາຫົວໜ່ວຍທຸລະກິດຮ້ານບັນເທີງ, ຮ້ານກິນດື່ມ, ຮ້ານຄາຣາໂອເກະໃຫ້ບໍລິການຮອດເວລາ 23:00 ໂມງ ຕ້ອງຢຸດເຊົາພ້ອມ ທັງປະຕິບັດຕາມຄໍາສັ່ງ, ແຈ້ງການຂອງລັດຖະບານວາງອອກຢ່າງເຂັ້ມງວດ.

    ຫ້າມຈອດລົດຊະຊາຍຕາມຖະໜົນຕ່າງໆ ເຊັ່ນ: ຖະໜົນສຸພານຸວົງ ແຕ່ໄຟອຳນາດບ້ານອາກາດ ເຖິງໄຟອຳນາດຫຼັກ 1, ຖະໜົນເສດຖາທິລາດ ແຕ່ໄຟອໍານາດຫຼັກ 1 ເຖິງ ໄຟອຳນາດທາດຂາວ, ຖະໜົນສາມແສນໄທ. ແຕ່ວັດສີເມືອງ ເຖິງຫຼັກ 2, ຖະໜົນເຈົ້າອານຸວົງ ແຕ່ 3 ແຍກປາກປາສັກ ເຖິງໄຟ ອຳນາດໂທລະໂຄ່ງ, ຖະໜົນຄູວຽງ ແຕ່ໄຟອຳນາດໂທລະໂຄ່ງ ເຖິງໄຟອຳນາດຕະຫຼາດເຊົ້າ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.