ໃນໄລຍະ 9 ເດືອນຢູ່ເມືອງຊຽງຮອນ ເກີດອຸບັດຕິເຫດ 13 ກໍລະນີ ເສຍຊີວິດ 3 ຄົນ

    0
    32

    ບັນຫາອຸບັດຕິເຫດຕາມທ້ອງຖະໜົນທີ່ຫຼາຍຄົນຄິດວ່າເປັນເລື່ອງທໍາມະດາເພາະວ່າ ມັກເກີດຂຶ້ນເປັນປະຈໍາ ແຕ່ຄວາມເປັນຈິງແລ້ວ ມັນເປັນບັນຫາໃຫຍ່ ທັງເປັນຄວາມສ່ຽງທີ່ໃກ້ຕົວທຸກຄົນ ແລະ ມີທ່າອ່ຽງເພີ່ມຂຶ້ນເລື້ອຍໆກາຍເປັນບັນຫາໃຫຍ່ທີ່ເປັນປະກົດການຫຍໍ້ທໍ້ທາງສັງຄົມ, ເຊິ່ງເຫັນໄດ້ວ່າໃນ ໄລຍະ 9 ເດືອນຜ່ານມາ ທົ່ວເມືອງຊຽງຮ່ອນ ໄດ້ມີອຸບັດຕິເຫດເກີດຂຶ້ນຫຼາຍຄັ້ງ ສ້າງຄວາມເສຍຫາຍເປັນຈຳນວນຫຼວງຫຼາຍ.

    ອີງຕາມຂໍ້ມູນຈາກກອງຈາລະຈອນ ພະແນກຕຳຫຼວດກອງບັນຊາການປ້ອງກັນຄວາມສະຫງົບ ເມືອງຊຽງຮ່ອນ ໃຫ້ຮູ້ວ່າ: ໄລຍະ 9 ເດືອນປີ 2022 ຜ່ານມາ, ຢູ່ເມືອງຊຽງຮ່ອນ ມີອຸບັດຕິເຫດເກີດຂຶ້ນ ທັງໝົດ 13 ກໍລະນີ; ມີຜູ້ຖືກຜົນກະທົບທັງໝົດ 32 ຄົນ ຍິງ 7 ຄົນ, ມີພາຫະນະເປ່ເພທັງໝົດ 18 ຄັນ. ໃນນັ້ນ, ພາຫະນະເປ່ເພສົມຄວນ 10 ຄັນ, ພາຫະນະເປ່ເພເລັກໜ້ອຍ 7 ຄັນ, ພາຫະນະໃຊ້ການບໍ່ໄດ້ 1 ຄັນ. ມີຄົນໄດ້ຮັບບາດເຈັບທັງໝົດ 16 ຄົນ, ບາດເຈັບສົມຄວນ 4 ຄົນ, ບາດເຈັບສາຫັດ 9 ຄົນ, ບາດເຈັບ ເລັກນ້ອຍ 7 ຄົນ ແລະ ມີຜູ້ເສຍ ຊີວິດ 3 ຄົນ, ຈຳນວນຜູ້ເສຍຊີວິດເພີ່ມຂຶ້ນເມື່ອທຽບໃສ່ 9 ເດືອນປີ 2021 ຜ່ານມາ. ສາເຫດຫຼັກທີ່ພາໃຫ້ເກີດອຸບັດຕິເຫດ ຍັງແມ່ນຍ້ອນການດື່ມສິ່ງມືນເມົາແລ້ວຂັບຂີ່ ຍານພາຫະນະ, ຮອງລົງມາແມ່ນ ຂັບຂີ່ລົດໄວ, ບໍ່ປະຕິບັດກົດລະ ບຽບຈາລະຈອນ ແລະ ຍ່າງບໍ່ຖືກທາງ. ອຸບັດຕິເຫດດັ່ງກ່າວໄດ້ສ້າງຄວາມເສຍທັງຊີວິດ ແລະ ຊັບສິນ.

    ອຸບັດຕິເຫດໃນໄລຍະ 9 ເດືອນຜ່ານມາ, ຖືວ່າເພີ່ມຂຶ້ນຫຼາຍກວ່າ 9 ເດືອນໃນປີ 2021 ເພາະມີຈຳນວນການເກີດອຸບັດຕິເຫດເພີ່ມຂຶ້ນ ຜູ້ເສຍຊີວິດກໍ່ເພີ່ມຂຶ້ນ ແລະ ມູນຄ່າຄວາມເສຍຫາຍກໍເພີ່ມຂຶ້ນຕາມໆກັນ. ບັນຫາອຸບັດຕິເຫດຕາມທ້ອງຖະໜົນແມ່ນປະກົດການຫຍໍ້ທໍ້ໃຫຍ່ຫຼວງອັນໜຶ່ງທີ່ກົດໜ່ວງທ່ວງດຶງການສ້າງສາພັດທະນາເສດຖະກິດ-ສັງຄົມ, ມັນເປັນສິ່ງທີ່ບໍ່ມີໃຜປາຖະໜາຢາກໃຫ້ເກີດຂຶ້ນກັບຕົນເອງ ແລະ ຄອບຄົວ. ບັນຫາອຸບັດ ຕິເຫດ ສາມາດປ້ອງກັນ ແລະ ຫຼຸດຜ່ອນໄດ້ຖ້າທຸກຄົນມີສະຕິໃນການຂັບຂີ່ ແລະ ປະຕິບັດກົດລະບຽບການຈາລາຈອນຢ່າງເຂັ້ມງວດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.