ມອບ-ຮັບ ຂົວອູ່ຂ້າມນໍ້າງື່ມ ບ້ານນໍ້າທົນ ແລະ ບ້ານນໍ້າວັນວິລະຊົນ ເມືອງເງິນ ມູນຄ່າກໍ່ສ້າງ 556 ລ້ານກວ່າກີບ

    0
    96

    ວັນທີ 8 ພະຈິກ 2022 ຜ່ານມາ, ທີ່ຫ້ອງປະຊຸມບ້ານນໍ້າທົນ, ເມືອງເງິນ ແຂວງໄຊຍະບູລີ ໄດ້ມີພິທີມອບ-ຮັບ ເປີດການນຳໃຊ້ຂົວອູ່ຂ້າມນໍ້າງື່ມ ບ້ານນໍ້າທົນ ແລະ ບ້ານນໍ້າວັນວິລະຊົນ ເປັນກຽດເຂົ້າຮ່ວມຂອງ ທ່ານ ດວງຕາ ໄຊວຸດ ຮອງເລຂາພັກແຂວງ, ມີທ່ານ ສໍາລານ ສຸວັນນະໂຊດ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ມີທ່ານ ທະວີສັກ ໄຊຍະວົງ ວ່າການເຈົ້າເມືອງໆເງິນ, ມີຫົວໜ້າ-ຮອງຫົວໜ້າຫ້ອງການ, ອົງການປົກຄອງບ້ານນໍ້າທົນ, ບ້ານນໍ້າວັນວິລະຊົນ, ບ້ານທີ່ຢູ່ໃກ້ຄຽງ ແລະ ປະຊາຊົນ 2 ບ້ານ ເຂົ້າຮ່ວມ.

    ທ່ານ ນາງ ຈັນສຸກ ວັນຍະວົງ ຕ່າງໜ້າບໍລິສັດຫລຸ້ງໂລດ ກໍ່ສ້າງຂົວທາງ ຊົນລະປະທານ ແລະ ເຄຫະສະຖານ (ຈໍາກັດຜູ້ດຽວ) ໃນນາມຜູ້ຮັບເໜົາກໍ່ສ້າງຂົວອູ່ ໄດ້ຂຶ້ນລາຍງານການຈັດຕັ້ງປະຕິບັດໂຄງກໍ່ສ້າງຂົວອູ່ຂ້າມນໍ້າງື່ມ ບ້ານນໍ້າທົນ ແລະ ບ້ານນໍ້າວັນວິລະຊົນ ວ່າ: ໄດ້ເລີ່ມລົງມືກໍ່ສ້າງມາແຕ່ວັນທີ 20 ສິງຫາ 2022 ຫາ ວັນທີ 21 ຕຸລາ 2022 ໃຊ້ເວລາການກໍ່ສ້າງ 2 ເດືອນ, ຂົວດັ່ງກ່າວມີຄວາມຍາວທັງໜົດ 95 ແມັດ, ມີເສົາຄໍ້າກາງ 2 ຕົ້ນ, ຊ່ວງຍາວສຸດ 34 ແມັດ, ກວາ້ງ 1,3 ແມັດ, ສາມາດຮັບນໍ້າໜັກໄດ້ 150 ກິໂລກຼາມ ມູນຄ່າການກໍ່ສ້າງທັງໜົດ 556.400.000 ກີບ ໂດຍແມ່ນທືນກໍ່ສ້າງຈາກກອງທຶນໄພພິບັດຂອງແຂວງໄຊຍະບູລີ ແລະ ທຶນສົມທົບຂອງປະຊາຊົນເປັນແຮງງານ.

    ຈາກນັ້ນ ທ່ານ ທະວີສັກ ໄຊຍະວົງ ວ່າການເຈົ້າເມືອງໆເງິນ ໃນນາມເຈົ້າຂອງໂຄງການໄດ້ຂຶ້ນກ່າວຮັບ ໂຄງການກໍ່ສ້າງຂົວອູ່ ພ້ອມທັງກ່າວມອບໃຫ້ອົງການປົກຄອງບ້ານນໍ້າທົນ ແລະ ບ້ານນໍ້າວັນວິລະຊົນ ເປັນຜູ້ປົກປັກຮັກສາ ແລະ ນໍາໃຊ້ ເພື່ອອໍານວຍສະດວກໃນການໄປມາຫາສູ່ກັນລະຫວ່າງບ້ານຕໍ່ບ້ານ ແລະ ບ້ານຫາເມືອງ.

    ຕອນທ້າຍ ທ່ານ ດວງຕາ ໄຊວຸດ ຮອງເລຂາພັກແຂວງ ໄດ້ມີຄໍາເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ບໍລິສັດຫລຸ່ງໂລດ ກໍ່ສ້າງຂົວທາງ ຊົນລະປະທານ ແລະ ເຄຫະສະຖານ (ຈໍາກັດຜູ້ດຽວ) ແລະ ອົງການປົກຄອງເມືອງທີ່ໄດ້ເອົາໃຈໃສ່ຊີ້ນໍາ ການກໍ່ສ້າງຂົວອູ່ ແລະ ໄດ້ສໍາເລັດຕາມແຜນການ, ພ້ອມທັງຮຽກຮ້ອງເຖິງອົງຈັດຕັ້ງບ້ານ ແລະ ປະຊາຊົນ ໃຫ້ເອົາໃຈໃສ່ໃນການປົກປັກຮັກສາ ຂົວອູ່ແຫ່ງນີ້ໃຫ້ນໍາໃຊ້ຍາວນານ, ພ້ອມທັງຕັດແພຜ້າ ເປີດປ້າຍ ໃນການນໍາໃຊ້ຂົວອູ່ ຢ່າງເປັນທາງການ.

    ຂ່າວ-ພາບ ສຸລີຍາ ແສງເດືອນ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.