ນາຍົກ ມີຄຳເຫັນແລະຮຽກຮ້ອງໃຫ້ເອົາໃຈໃສ່ 5 ວຽກສຳຄັນ ເພື່ອລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ

    0
    36

    ວັນທີ 25 ພະຈິກ ຂອງທຸກໆປີ ເປັນວັນລະນຶກສາກົນ ເພື່ອລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ຊຶ່ງວົງຄະນາຍາດສາກົນໄດ້ຖືໂອກາດນີ້ ຢໍ້າຄືນຄວາມໝາຍໝັ້ນຂອງຕົນ ເພື່ອຕ້ານ ແລະ ລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງໃນທົ່ວໂລກ. ລັດຖະບານ ແຫ່ງ ສປປ ລາວ ໃນຖານະເປັນ

    ປະເທດສະມາຊິກຂອງອົງການສະຫະປະຊາຊາດ ໃຫ້ຄວາມສໍາຄັນເປັນຢ່າງຍິ່ງ ຕໍ່ວັນສາກົນດັ່ງກ່າວນີ້ ຊຶ່ງປີນີ້ ດໍາເນີນພາຍໃຕ້ຫົວຂໍ້: “ສາມັກຄີກັນເຄື່ອນໄຫວ ເພື່ອລຶບລ້າງທຸກຮູບແບບ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ໃນນັ້ນຮຽກຮ້ອງໃຫ້ບັນດາປະເທດໃນທົ່ວໂລກ ເພີ່ມທະວີຄວາມຮັບຮູ້ຄວາມເຂົ້າໃຈ ພ້ອມທັງສົ່ງເສີມຄວາມຮູ້ ແລະ

    ນະວັດຕະກຳທັນສະໄໝໃຫ້ແກ່ປະຊາຊົນຂອງຕົນ ແນໃສ່ລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງໃຫ້ໝົດໄປຕະຫລອດການ. ໝາກຜົນຂອງຂະບວນການດັ່ງກ່າວ ຈະເກີດຂຶ້ນໄດ້ ກໍຕໍ່ເມື່ອໄດ້ຮັບການສະໜັບສະໜູນຈາກລັດຖະບານປະເທດຕ່າງໆ, ທຸກຊັ້ນຄົນໃນສັງຄົມ ກໍຄືຈາກບັນດາອົງການຈັດຕັ້ງສາກົນ.

    ດັ່ງພວກເຮົາຮູ້ນໍາກັນດີແລ້ວວ່າ: ສປປ ລາວ ໄດ້ເລີ່ມຈັດຕັ້ງຂະບວນການລະນຶກວັນສາກົນ ເພື່ອລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງແຕ່ປີ 2011 ເປັນຕົ້ນມາ ເພື່ອໂຄສະນາປູກຈິດສໍານຶກໃຫ້ທຸກພາກສ່ວນໃນສັງຄົມຮັບຮູ້ເຂົ້າໃຈວ່າ: ຄວາມຮຸນແຮງຕໍ່ແມ່ຍິງແມ່ນການລະເມີດສິດຂັ້ນພື້ນຖານຂອງແມ່ຍິງ, ເປັນການຈຳແນກ

    ທັງສ້າງອຸປະສັກໃນການມີສ່ວນຮ່ວມໃນດ້ານຕ່າງໆ ເຊິ່ງສົ່ງຜົນກະທົບຢ່າງຫລວງຫລາຍ ຕໍ່ການພັດທະນາແມ່ຍິງ, ການພັດທະນາເສດຖະກິດ-ສັງຄົມແຫ່ງຊາດ.
    ໄລຍະ 1 ປີຜ່ານມາ, ລັດຖະບານແຫ່ງ ສປປ ລາວ ກໍຄື ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແລະ ພາກສ່ວນກ່ຽວຂ້ອງ ໄດ້

    ເອົາໃຈໃສ່ຕ້ານ ແລະ ສະກັດກັ້ນທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງພ້ອມທັງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX (2021-2025) ຕິດພັນກັບການສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ, ເວົ້າສະເພາະ

    ແມ່ນການຜັນຂະ ຫຍາຍ ແລະ ຈັດຕັ້ງປະຕິບັດແຜນດຳເນີນງານເພື່ອຄວາມສະເໝີພາບ ຍິງ-ຊາຍ ແລະ ແຜນດຳເນີນງານແຫ່ງຊາດເພື່ອລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ຕໍ່ເດັກໃຫ້ບັນລຸຕາມຄາດໝາຍທີ່ວາງໄວ້ໂດຍເຊື່ອມສານເຂົ້າໃນແຜນພັດທະນາຂອງບັນດາຂະແໜງການ. ອັນພົ້ນເດັ່ນໄດ້ສ້າງເຄື່ອງມືແລະ ກົນໄກການ

    ປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກຍິງ ພ້ອມທັງສ້າງຂີດຄວາມສາມາດ ໃຫ້ແກ່ໜ່ວຍງານຕ່າງໆທີ່ຮັບຜິດຊອບວຽກງານຕ້ານ ແລະ ສະກັດກັ້ນທຸກຮູບແບບການໃຊ້ຄວາມຮຸນແຮງຢູ່ຂັ້ນສູນກາງ ແລະ ທ້ອງຖິ່ນ ເພື່ອປະກອບສ່ວນຈັດຕັ້ງປະຕິບັດວຽກງານດັ່ງກ່າວໃຫ້ປາກົດຜົນເປັນຈິງ.

    ໃນໂອກາດລະນຶກວັນສາກົນ ເພື່ອລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ປີ 2022, ຂ້າພະເຈົ້າ ຂໍຮຽກຮ້ອງມາຍັງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການປົກຄອງທຸກຂັ້ນ, ພາກສ່ວນເອກະຊົນຕະຫລອດຮອດປະຊາຊົນບັນດາເຜົ່າຈົ່ງພ້ອມກັນເອົາໃຈໃສ່ ຈັດຕັ້ງປະຕິບັດວຽກງານສຳຄັນ ດັ່ງນີ້:

    1) ສືບຕໍ່ເອົາໃຈໃສ່ໂຄສະນາປູກຈິດສຳນຶກ ແລະ ໃຫ້ຄວາມຮູ້ກ່ຽວກັບຄວາມສະເໜີພາບຍິງ-ຊາຍ, ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ເຜີຍແຜ່ກົດໝາຍວ່າດ້ວຍການຕ້ານ ແລະ ສະກັດກັ້ນທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງໃຫ້ແກ່ທຸກພາກສ່ວນທົ່ວສັງຄົມ ແລະ ຄົນຮຸ່ນໃໝ່ ໂດຍສະເພາະນັກຮຽນ,

    ນັກສຶກສານັບແຕ່ຊັ້ນອະນຸບານຈົນຮອດຂັ້ນມະຫາວິທະຍາໄລຮັບຮູ້ເຂົ້າໃຈຢ່າງຖືກ ຕ້ອງ; ຝຶກອົບຮົມການປ້ອງກັ ບໍ່ໃຫ້ເກີດຄວາມຮຸນແຮງໃນໂຮງຮຽນໃຫ້ຄູອາຈານທຸກຂັ້ນຮັບຮູ້ ແລະເຂົ້າໃຈ. ພ້ອມນັ້ນກໍປັບປຸງຫລັກສູດການຮຽນ-ການສອນໃຫ້ເຊື່ອມສານກັບບົດບາດຍິງ-ຊາຍລວມທັງການໂຄສະນາວຽກງານດັ່ງກ່າວຜ່ານສື່ທຸກປະເພດ.

    2) ເພີ່ມທະວີຄວາມຮັບຜິດຊອບໂຄສະນາສ້າງຄວາມຮັບຮູ້ກ່ຽວກັບການຕ້ານທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງໃຫ້ແກ່ຫົວໜ່ວຍແຮງງານຕ່າງ ລວມທັງຜູ້ທີ່ຈະໄປອອກແຮງງານພາຍໃນແລະ ຕ່າງປະເທດຢ່າງກວ້າງຂວາງ ແລະ ທົ່ວເຖິງ.

    3) ສ້າງຄວາມເຂົ້າໃຈກ່ຽວກັບຕ້ານທຸກຮູບແບບການໃຊ້ຄວາມຮຸນແຮງໃນຄອບຄົວ ແລະ ຊຸມຊົນໃຫ້ບັນດາຜູ້ຊົງຄຸນວຸດທິ, ຜູ້ອາວຸໂສ, ຜູ້ນຳຊຸມຊົນ ແລະ ຜູ້ຊາຍລາວທົ່ວໄປ. ພ້ອມນັ້ນ ກໍຕ້ານທັດສະນະຄະຕິທີ່ເປັນການຫລຸດຄຸນຄ່າຂອງແມ່ຍິງ, ເອົາໃຈໃສ່ແກ້ໄຂຮີດຄອງອັນຫລ້າຫລັງທີ່ກົດໜ່ວງຖ່ວງດຶງຄວາມກ້າວໜ້າຂອງແມ່ຍິງ, ສົ່ງເສີມ

    ໃຫ້ເຄົາລົບນັບຖື ແລະ ໃຫ້ກຽດເຊິ່ງກັນ ແລະ ກັນລະຫວ່າງ ຍິງ-ຊາຍ, ລຶບລ້າງທຸກຮູບແບບການໃຊ້ຄວາມຮຸນແຮງ ຕໍ່ແມ່ຍິງ ແລະ ການຈຳແນກຕໍ່ແມ່ຍິງ ແລະ ເດັກຍິງ.
    4) ສ້າງຄວາມເຂັ້ມແຂງໃຫ້ກົນໄກຮັບຜິດຊອບການໃຫ້ບໍລິການ ແລະ ຊ່ວຍເຫລືອ ຜູ້ຖືກເຄາະຮ້າຍຈາກຄວາມຮຸນແຮງໃຫ້ເຂົ້າເຖິງການປິ່ນປົວສຸຂະພາບ, ຊ່ວຍເຫລືອດ້ານ

    ກົດໝາຍ, ໃຫ້ຄຳປຶກສາ, ໃຫ້ທີ່ພັກເຊົາ, ຝຶກອົບຮົມວິຊາຊີບ ແລະ ການກັບຄືນສູ່ພູມລຳເນົາທີ່ປອດໄພເພື່ອຮັບປະກັນໃຫ້ຜູ້ຖືກເຄາະຮ້າຍ ໄດ້ເຂົ້າເຖິງການບໍລິການຕ່າງໆທີ່ໄດ້ກ່າວໄປແລ້ວນັ້ນໃຫ້ທັນເວລາ ແລະ ຍຸຕິທຳ.

    5) ທຸກພາກສ່ວນໃຫ້ຄວາມຮ່ວມມື ແລະ ເອົາໃຈໃສ່ຈັດສັນຊັບພະຍາກອນມະນຸດທີ່ມີຄວາມຮູ້ຄວາມສາມາດ, ປະສົບການ ແລະ ຈັດສັນງົບປະມານຢ່າງເໝາະສົມເພື່ອຈັດຕັ້ງປະຕິບັດວຽກງານຕ້ານ ແລະ ສະກັດກັ້ນທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງຕັ້ງໜ້າຜັນຂະຫຍາຍ ແລະ ຈັດຕັ້ງປະຕິບັດແຜນດຳເນີນງານແຫ່ງຊາດ

    ເພື່ອປ້ອງກັນ ແລະ ລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະຄວາມຮຸນແຮງຕໍ່ເດັກ ໃຫ້ມີຜົນສຳເລັດຫລາຍກວ່າເກົ່າ.

    ພ້ອມນັ້ນ, ຂ້າພະເຈົ້າຂໍຮຽກຮ້ອງມາຍັງອົງການຈັດຕັ້ງສາກົນ, ອົງການຈັດຕັ້ງທາງສັງຄົມທັງພາຍໃນ ແລະ ຕ່າງປະເທດທີ່ເຄື່ອນໄຫວວຽກງານຢູ່ ສປປ ລາວ ຈົ່ງໃຫ້ຄວາມ

    ຮ່ວມມື ແລະ ເປັນເຈົ້າການຮ່ວມກັນຕ້ານ ແລະ ສະກັດກັ້ນທຸກຮູບແບບການໃຊ້ຄວາມຮຸນແຮງຕໍ່ແມ່ຍິງໃຫ້ນັບມື້ຫລຸດລົງ ແລະ ໝົດໄປເຮັດໃຫ້ສັງຄົມລາວກາຍເປັນສັງຄົມທີ່ໂອບເອື້ອອາລີສາມັກຄີເປັນປຶກແຜ່ນ, ເປັນສັງຄົມປະຕິບັດສິດສະເໝີພາບຍິງ-ຊາຍ ທີ່ແທ້ຈິງ.

    ຂ້າພະເຈົ້າ ຂໍອວຍພອນໄຊອັນປະເສີດມາຍັງການນຳພັກ-ລັດ, ພະນັກງານ-ລັດຖະກອນ, ທະຫານ, ຕໍາຫລວດຕະຫລອດຮອດປະຊາຊົນລາວບັນດາເຜົ່າໃນທົ່ວປະເທດຈົ່ງມີສຸຂະພາບແຂງແຮງ ແລະ ປະສົບຜົນ ສຳເລັດໃນໜ້າທີ່ວຽກງານອັນມີກຽດຂອງຕົນພ້ອມທັງສ້າງໃຫ້ຄອບຄົວ, ຊຸມຊົນ ແລະ ສັງຄົມປາສະຈາກການໃຊ້ຄວາມຮຸນແຮງຕໍ່ແມ່ຍິງ

    ແລະ ເດັກຍິງ. ການລະນຶກວັນສາກົນເພື່ອລຶບລ້າງທຸກຮູບແບບການໃຊ້ຄວາມຮຸນແຮງຕໍ່ແມ່ຍິງປີນີ້ ພາຍໃຕ້ຫົວຂໍ້ “ສາມັກຄີກັນເຄື່ອນໄຫວ ເພື່ອລຶບລ້າງທຸກຮູບແບບ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ຈົ່ງປະສົບຄວາມສຳເລັດຕາມລະດັບຄາດໝາຍທີ່ວາງໄວ້.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.